సైక్లింగ్లో ఇదివరకే లక్ష కిలోమీటర్లు ఆయన ప్రయాణించారు. అంతటితో ఆగకుండా గిన్నిస్ బుక్ ఆఫ్ రికార్డ్స్లో చోటు సంపాదించడమే లక్ష్యంగా మరింత కృషి చేస్తూ దూసుకుపోతున్నారు పంజాబ్కు చెందిన 53 ఏళ్ల డాక్టర్ పవన్ ధింగ్రా. పని ఒత్తిడి, బద్ధకం ఇతరత్రా కారణాలను సాకుగా చూపి వ్యాయామం, యోగా వంటి వాటికి దూరంగా ఉంటున్న నేటి యువతకు స్ఫూర్తిగా నిలుస్తున్నారు.
ఇప్పటివరకు 153 ఈవెంట్లలో పాల్గొన్న పవన్ ధింగ్రా 66,600 కిలోమీటర్ల సైక్లింగ్ను పూర్తి చేశారు. ఈవెంట్లలో మాత్రమే కాకుండా వ్యక్తిగతంగానూ ఇప్పటివరకు దేశమంతటా కలిపి సుమారు లక్ష కిలోమీటర్ల దూరం వరకు సైకిల్ను తొక్కారు. ఇటీవలే ఆయన ఈ ఘనతను సాధించారు. దీంతో ఆసియా బుక్ ఆఫ్ రికార్డ్స్లో తన పేరును లిఖించుకున్నారు.
సైక్లిస్ట్ డాక్టర్ పవన్ ధింగ్రా సైక్లింగ్తో సంచలనాలు!
లుథియానాకు చెందిన డాక్టర్ పవన్ ధింగ్రా గత 6 సంవత్సరాలుగా సైకిల్ తొక్కుతున్నారు. దీనినే ఒక హాబీగా మార్చుకున్నారు. 2017లో సైకిల్ తొక్కడం ప్రారంభించిన ఆయన సైక్లింగ్లో పలు మైలురాయిలను దాటుకుంటూ ఇండియా బుక్ ఆఫ్ రికార్డ్స్లో 3 సార్లు తన పేరును నమోదు చేసుకున్నారు. ప్రస్తుతం ప్రతిష్ఠాత్మక గిన్నిస్ బుక్ ఆఫ్ వరల్డ్ రికార్డ్స్లో చోటు సంపాదించడమే లక్ష్యంగా మరింత కష్టపడుతున్నారు. ఇందుకు కావాల్సిన అర్హత.. 200 ఈవెంట్లలో కలిపి మొత్తం లక్ష కిలోమీటర్ల వరకు సైక్లింగ్ చేయడం. ప్రస్తుతం ఈ ఫీట్ను అందుకునేందుకు కృషి చేస్తున్నారు.
కుటుంబం మొత్తం వైద్యరంగంలోనే..
డాక్టర్ పవన్ ధింగ్రా MBBS, MS (ఆర్థోపెడిక్స్) పూర్తి చేశారు. ఈయన ప్రస్తుతం లుథియానాలోని దేవ్ హాస్పిటల్‌లో ఆర్థోపెడిక్ సర్జన్గా సేవలందిస్తున్నారు. ఈయన భార్య డాక్టర్ రీతు ఇదే ఆస్పత్రిలో గైనకాలజిస్ట్‌గా పనిచేస్తున్నారు. వీరికి ఇద్దరు కుమారులు ఉన్నారు. ఇద్దరూ లుథియానాలోనే ఎంబీబీఎస్‌ చదువుతున్నారు.
సైక్లిస్ట్ డాక్టర్ పవన్ ధింగ్రా 153 ఈవెంట్లు.. 66 వేలకిపైగా కి.మీ!
2023 మార్చి వరకు 153 పోటీల్లో పాల్గొన్న పవన్ ధింగ్రా మొత్తం 66,600 కి.మీల మేర సైకిల్పై ప్రయాణం చేశారు. 1000 కి.మీ (దిల్లీ-వాహ్గా-దిల్లీ), 1200 కి.మీ (నోయిడా-జమ్మూ-నోయిడా), 1200 కి.మీ (జలంధర్-జమ్మూ-సురత్‌ఘర్-జలంధర్), 1400 కి.మీ (దిల్లీ-నేపాల్-దిల్లీ), 1200 కి.మీ (పారిస్ బ్రెస్ట్ ప్యారిస్), 1200 కి.మీ (దిల్లీ-కల్కా-ఉనా-మెక్‌లియోడ్‌గంజ్-బజ్నాథ్-ధర్మశాల-దిల్లీ). వీటితో పాటు 6 రోజులు, 5 రాత్రులు కలిపి సుమారు 1460 కి.మీ.లు (ఇండియా గేట్-గేట్‌వే ఆఫ్ ఇండియా) ప్రయాణించారు. ఇలా రాత్రింబవళ్లు తేడాల్లేకుండా దిల్లీ వంతెన, హౌరా వంతెనల మీదుగా 1480 కి.మీలు సైకిల్ తొక్కారు. వరల్డ్ అల్ట్రా సైక్లింగ్ అసోసియేషన్ సర్టిఫైడ్ మల్టీ-డే స్టేజ్డ్ రేస్ ఫార్మాట్‌లో ఇటీవల 14 రోజులు, 13 రాత్రులు కలుపుకొని (శ్రీనగర్ నుంచి కన్యాకుమారి) వరకు 3650 కి.మీల ప్రయాణాన్ని పూర్తి చేశారు.
మంచి ఆరోగ్యానికి సైక్లింగ్!
పవన్‌కు 47 ఏళ్ల వయసులో కంటి నుంచి రక్తం కారింది. దీంతో ఆయన కచ్చితంగా సైకిల్ తొక్కాల్సిన అవసరం ఏర్పడింది. దీంతో తన శరీరాన్ని దృఢంగా ఉంచుకునేందుకు సమయం కేటాయించాలని నిర్ణయించుకున్నారు. అలా మొదలైన్ డాక్టర్ పవన్ సైక్లింగ్ యాత్ర గత 6 సంవత్సరాలుగా ఎటువంటి ఆటంకాలు లేకుండా నిర్విరామంగా కొనసాగుతోంది.
డాక్టర్ పవన్ ధింగ్రా సాధించిన పతకాలు ఈ క్రమంలో ఆయన పదుల సంఖ్యలో పతకాలను సొంతం చేసుకున్నారు. ఇకపై తన దృష్టంతా గిన్నిస్ బుక్ ఆఫ్ రికార్డ్స్లో చోటు సంపాదించడం పైనే పెడతానని చెబుతున్నారు. అందుకు కావాల్సిన అర్హతలను సాధించేందుకు తీవ్రంగా కృషి చేస్తున్నట్లుగా ఆయన తెలిపారు. వైద్యుడిగా పవన్ 5 రోజులు సేవలందిస్తారు. శని, ఆదివారాలను సైక్లింగ్ ప్రాక్టీస్కు కేటాయిస్తారు.
"సైక్లింగ్తో అనేక ఆరోగ్య లాభాలు ఉన్నాయి. నేటి యువత కూడా సైక్లింగ్, వ్యాయామం, యోగా వంటి వాటిపై దృష్టి పెట్టాలి. అందుకు తగిన సమయాన్ని కేటాయించుకోవాలి. వీటితోనే మన ఆరోగ్యాన్ని జాగ్రత్తగా ఉంచుకోగలం"
- డాక్టర్. పవన్ ధింగ్రా, సైక్లిస్ట్
