మే 1 నుంచి వ్యాక్సినేషన్.. ఆ రాష్ట్రాల్లో డౌటే!

మే 1 నుంచి 18 ఏళ్లు పైబడిన వారందరికీ కరోనా టీకా పంపిణీ ప్రారంభం కానున్న నేపథ్యంలో.. తమ వద్ద సరిపడా వ్యాక్సిన్​ డోసులు లేవని దిల్లీ, పంజాబ్, గుజరాత్​, మహారాష్ట్ర రాష్ట్రాలు తెలిపాయి. తమ రాష్ట్రాల్లో వ్యాక్సినేషన్ ప్రక్రియ మే 1 నుంచి ప్రారంభమయ్యే అవకాశాలు లేవని స్పష్టం చేశాయి.

మే 1 నుంచి ప్రారంభం కానున్న మూడో దశ వ్యాక్సినేషన్ ప్రక్రియ.. తమ రాష్ట్రాల్లో ఆలస్యం కావొచ్చని దిల్లీ, పంజాబ్, గుజరాత్​, మహారాష్ట్ర రాష్ట్రాలు స్పష్టం చేశాయి. టీకాల కొరతే ప్రధాన కారణమని తెలిపాయి.

టీకాల కొరతే కారణం..

మూడో దశ వ్యాక్సినేషన్ ప్రక్రియ ప్రారంభించటానికి.. తమ దగ్గర వ్యాక్సిన్​లు లేవని దిల్లీ ఆరోగ్యశాఖ మంత్రి స్పష్టం చేశారు. 67లక్షల కోవిషీల్డ్ డోసులు ఆర్డర్​ ఇచ్చామన్నారు. మే1 నుంచి 18ఏళ్లు పైబడిన వారందరికీ కరోనా టీకా పంపిణీ పంజాబ్​లో ఆలస్యం అవనుందని ఆందోళన వ్యక్తం చేశారు ఆ రాష్ట్ర ఆరోగ్య మంత్రి బల్బీర్ సింగ్ సిద్ధూ. రాష్ట్రంలో సరిపడా కరోనా టీకాలు లేకపోవడమే ఇందుకు కారణమని తెలిపారు. 45 ఏళ్లు పైబడిన వారికి వ్యాక్సిన్ పంపిణీలోనూ టీకాల కొరత ఉందని మహారాష్ట్ర, రాజస్థాన్​, ఛత్తీస్​గఢ్ రాష్ట్రాలు ఇప్పటికే కేంద్రానికి ఫిర్యాదు చేశాయి.

అదేం లేదు..

అయితే కేంద్ర ఆరోగ్య, వైద్య శాఖ మాత్రం.. దేశంలో టీకా కొరత లేదని స్పష్టంచేసింది. ఇంకా కోటికి పైగా కరోనా వ్యాక్సిన్​ డోసులు రాష్ట్రాలు, కేంద్రపాలిత ప్రాంతాల దగ్గర ఉన్నాయని వివరించింది. మరో మూడు రోజుల్లో 20 లక్షలకుపైగా డోసులను రాష్ట్రాలకు అందిస్తామని పేర్కొంది.

ఇప్పటి వరకు దేశవ్యాప్తంగా 15 కోట్లకుపైగా వ్యాక్సిన్ డోసులను అందించామని స్పష్టం చేసింది.

ఇదీ చదవండి :ప్రధాని నేతృత్వంలో నేడు కేంద్ర మంత్రిమండలి భేటీ