పసివాడి ప్రాణం కోసం రూ.16 కోట్ల ఇంజెక్షన్​

అరుదైన వ్యాధితో బాధపడుతున్న ఏడాది బాలుడికి వైద్యం అందించేందుకు రూ.16 కోట్లు ఖర్చు అవుతుందని తెలుసుకున్న తల్లిదండ్రులు.. క్రౌడ్​ ఫండింగ్​ ద్వారా డబ్బు సమకూర్చేందుకు ప్రయత్నిస్తున్నారు. మూడు నెలల్లోగా చికిత్స అందించాలని వైద్యులు సూచించిన నేపథ్యంలో ఆర్థిక సాయం చేయాలని ప్రముఖులను కోరుతున్నారు.

మహారాష్ట్ర పుణెకు చెందిన యువాన్​ అనే ఏడాది బాలుడు.. స్పైనల్ మస్క్యులర్ ఆట్రోపి(ఎస్​ఎంఏ)తో బాధపడుతున్నాడు. ఆ బాలుడికి వైద్యం అందించాడానికి రూ.16 కోట్లు ఖర్చవుతుంది. బాలుడి తల్లిదండ్రులు అమిత్​, రూపాలి రామ్‌తేక్కర్​.. క్రౌడ్ ఫండింగ్​ ద్వారా ఆ డబ్బును సేకరించడానికి ప్రయత్నిస్తున్నారు.

ఈ వ్యాధికి జోల్జెన్​స్మా​ థెరపీ చేయాలి. అయితే ఇలాంటి అరుదైన జన్యు సంబంధిత వ్యాధులకు మన దేశంలో చికిత్స లేదు. విదేశాల నుంచి ఇంజెక్షన్​ తెప్పించాలి. ఇందు​కు కావాల్సిన డబ్బును 'క్రౌడ్ ఫండింగ్' రూపంలో సేకరించాలని నిర్ణయించుకున్నారు. 23 రోజుల్లో రూ. 25 లక్షలు సేకరించారు.

ప్రస్తుతం దీననాథ్ మంగేష్కర్​ ఆసుపత్రిలో చికిత్స పొందుతున్న యువాన్​కు మూడు నెలల్లోగా ఆ ఇంజెక్షన్​ ఇవ్వాలని వైద్యులు సూచించారు.

వ్యాధితో బాధపడుతున్న బాలుడితో తల్లిదండ్రులు

టీరా కామత్​ విషయంలోనూ ఇలాగే..

గతంలో ఎస్​ఎంఏతో బాధపడిన ముంబయికి చెందిన మూడు నెలల టీరా అనే పాప తల్లిదండ్రులు.. క్రౌడ్​ ఫండింగ్​ ద్వారానే రూ.16 కోట్లు సేకరించి వైద్యం అందించారు. అనంతరం ఆ చిన్నారిని ఆసుపత్రి నుంచి డిశ్చార్జి చేశారు.

ఇదీ చూడండి:చిన్నారి వైద్యం కోసం నెటిజన్ల రూ.16 కోట్ల విరాళం

ఏంటీ వ్యాధి?

ఎస్​ఎంఏ జన్యు సంబంధిత వ్యాధి. వెన్నముక కండరాలు క్షీణింపచేయడం ఈ వ్యాధి లక్షణం. పిల్లలు మెడ పైకెత్తడం, నడవడం, కూర్చోవడం చేయలేరు. సరిగా పడుకోవడం కూడా ఉండదు. తినేటప్పుడు కండరాలు సహకరించకపోవడం.. శ్వాస తీసుకోవడం కూడా ఇబ్బందిగా ఉంటుంది.

ఇదీ చూడండి:పండంటి కిడ్నీకి 12 సూత్రాలు!