'ఈ నెల 30న దేశవ్యాప్తంగా నిరాహార దీక్షలు'

ఫిబ్రవరి 1న నిర్వహించ తలపెట్టిన పార్లమెంట్​ మార్చ్​ను రద్దు చేస్తున్నట్లు రైతు సంఘాలు తెలిపాయి. అయితే జనవరి 30న దేశవ్యాప్తంగా ప్రజా కార్యక్రమాలు, నిరాహార దీక్షలు చేపడతామని​ రైతు సంఘాల నాయకులు స్పష్టం చేశారు. దిల్లీ ఘటనపై దర్యాప్తు చేపట్టాలని డిమాండ్ చేశారు.

దిల్లీలో చెలరేగిన హింస తరువాత బుధవారం సమావేశమైన రైతు సంఘాల నాయకులు పలు అంశాలపై కీలక నిర్ణయాలు తీసుకున్నారు. బడ్జెట్ డే సందర్భంగా ఫిబ్రవరి 1 న నిర్వహించాల్సిన పార్లమెంట్​ మార్చ్​ను రద్దు చేస్తున్నట్లు తెలిపారు. జనవరి 30న దేశవ్యాప్తంగా ప్రజా కార్యక్రమాలు, నిరాహార దీక్షలు చేపడతామన్నారు. ఎర్రకోటలో విధ్వంసం విద్రోహ శక్తుల పనేనని.. ఈ ఘటనపై దర్యాప్తు జరపాలని డిమాండ్ చేశారు. రైతు ఉద్యమం మాత్రం కొనసాగుతుందన్నారు.

'దీప్​ సిధ్ ఆర్​ఎస్​ఎస్​ వ్యక్తి'

దీప్ సిధ్ ఆర్​ఎస్ఎస్​ వ్యక్తి అని రైతు సంఘాల నాయకుడు దర్శన్​ పాల్​ ఆరోపించారు. సిధ్​ భాజపా ఎంపీ సన్నీ దేఓల్​కు సన్నిహితుడని తెలిపారు. రైతు ఉద్యమానికి సిధ్​మద్దతు ఇవ్వటంతోదేఓల్​​ అతడ్ని దూరం పెట్టారన్నారు.

'ఎర్రకోట ఘటన బాధాకరం'

మంగళవారం జరిగిన ట్రాక్టర్​ ర్యాలీలో రెండు లక్షలకు పైగా ట్రాక్టర్​లు పాల్గొన్నాయని, లక్షల మంది రైతులు కదిలి వచ్చారని రైతు నాయకుడు బల్​బీర్ సింగ్​ తెలిపారు. 99.9శాతం ర్యాలీ ప్రశాంతంగా జరిగిందన్నారు. ఎర్రకోట ఘటన బాధాకరమని, ఈ ఘటనకు నైతిక బాధ్యత వహిస్తున్నామని స్వరాజ్ ఇండియా నాయకుడు యోగేంద్ర యాదవ్ తెలిపారు. దిల్లీ హింస వెనుక కొన్ని అసాంఘిక శక్తులు ఉన్నాయన్నారు. ఈ ఘటనపై దర్యాప్తు జరపాలని డిమాండ్ చేశారు.

ఇదీ చదవండి :'ట్రాక్టర్​ ర్యాలీ'తో రైతు ఉద్యమానికి బీటలు!