గాల్లోకి ఎగిరిన కొద్దిసేపటికే విమానంలో మంటలు చెలరేగాయి. 185 మంది తమ ప్రాణాలను అరచేతిలో పెట్టుకుని దేవుడిని తలుచుకున్నారు. క్షేమంగా దిగితే చాలని అంతా అనుకుంటున్నారు. అలాంటి సమయంలో చాకచక్యంగా వ్యవహరించి.. ఒకే ఇంజిన్తో విమానాన్ని సురక్షితంగా ల్యాండింగ్ చేశారు పైలట్ మోనికా ఖన్నా. 185 మంది ప్రాణాలను కాపాడిన ఆమెపై సర్వత్రా ప్రశంసల వర్షం కురుస్తోంది.
ప్రమాదం అనంతరం స్పైస్జెట్ విమానం బిహార్లోని పట్నా నుంచి దిల్లీకి ఆదివారం మధ్యాహ్నం బయలుదేరిన స్పైస్ జెట్ విమానం బోయింగ్ 737 గాల్లోకి ఎగిరిన కొద్దిసేపటికే ఓ పక్షి ఢీకొట్టటం వల్ల ఒక ఇంజిన్లో మంటలు చెలరేగాయి. దీంతో తిరిగి పట్నాలోనే అత్యవసరంగా ల్యాండింగ్ చేశారు పైలట్లు. త్రుటిలో ప్రమాదం నుంచి తప్పించారు. ఈ సంఘటన జరిగిన మరుసటి రోజు తమ పైలట్లపై ప్రశంసలు కురిపించారు స్పైస్జెట్ చీఫ్ ఆఫ్ ఫ్లైట్ ఆపరేషన్స్, హెడ్ ఆఫ్ పైలట్స్ గురుచరణ్ అరోడా. తమ పైలట్లు చేసిన పనికి గర్వంగా ఉందని, వారు నిపుణులైనందున వారిపై ప్రయాణికులు నమ్మకంగా ఉండాలని కోరారు.
"స్పైస్జెట్ పైలట్లు అందరిపైనా నమ్మకం ఉంచాలని ప్రయాణికులను కోరుతున్నా. విమానం నడపటంలో వారికి ఎంతో నైపుణ్యం ఉంది. పట్నాలో జరిగిన సంఘటనలో స్పైస్జెట్ పైలట్లు వ్యవహరించిన తీరు మాకు ఎంతో గర్వకారణం. ఎలాంటి పరిస్థితులనైనా ఎంతో ఓపికగా ఎందుర్కోగల సామర్థ్యం మా పైలట్లకు ఉంది. వారిపట్ల ప్రయాణికులంతా గర్వపడాలి. "
- కెప్టెన్ గురుచరణ్ అరోడా
మోనికా ఖన్నాపై స్పైస్జెట్ ప్రశంసలు..విమానంలో మంటలు చెలరేగి.. క్లిష్ట పరిస్థితులు ఏర్పడినప్పటికీ ఒకే ఇంజిన్తో సురక్షితంగా ల్యాండ్ చేసిన పైలట్ మోనికా ఖన్నా, ఫస్ట్ ఆఫీసర్ బల్ప్రీత్ సింగ్ భాటియాపై స్పైస్ జెట్ ప్రశంసలు కురిపించింది. 'ప్రమాదం జరిగిన సమయంలో కెప్టెన్ మోనికా ఖన్నా, ఫస్ట్ ఆఫీసర్ బల్ప్రీస్ సింగ్ భాటియా ఆందోళన చెందకుండా.. చాకచక్యంగా వ్యవహరించి పరిస్థితి చక్కదిద్దారు. వారు ఎంతో ప్రశాంతంగా ఉండి విమానాన్ని నియంత్రించారు. వారి నైపుణ్యంతో ఒకే ఇంజిన్ పని చేస్తున్నప్పటికీ విమానం సురక్షితంగా దిగింది. ప్రమాదం తర్వాత ఇంజినీర్లు విమానాన్ని పరిశీలించారు. పక్షి ఢీకొట్టటం వల్ల ఫ్యాన్ బ్లేడ్ విరిగిపోవటం, ఇంజిన్ పాడైపోయినట్లు ధ్రువీకరించారు. దీనిపై డీజీసీఏ విచారణ చేపట్టింది. వారు ఎంతో అనుభవం ఉన్న పైలట్లు. వారి పట్ల మాకు ఎంతో గర్వంగా ఉంది.' అని పేర్కొన్నారు కెప్టెన్ అరోడా.
డీజీసీఏ సహా స్పైస్జెట్ అంతర్గతంగా చేపట్టిన విచారణలో పాల్గొన్నారు ఇద్దరు పైలట్లు. మరోవైపు.. కంపెనీ నిబంధనల ప్రకారం కొన్ని రోజుల పాటు వారిని విధుల్లోకి పంపించరు. స్పైస్జెట్కు సంబంధించి ఇలాంటి ఘటనే ఆదివారం మరొకటి జరగటం గమనార్హం. దిల్లీ నుంచి బయలుదేరిన స్పైస్జెట్ విమానం బంబార్డియర్ క్యూ400 డాష్ 8లో ప్రయాణికులు ఊపిరి తీసుకునేందుకు ఇబ్బందులు పడ్డారు. క్యాబిన్లో ఒత్తిడి పెరిగినట్లు గుర్తించిన పైలట్లు.. తిరిగి విమానాన్ని సురక్షితంగా దిల్లీలో ల్యాండ్ చేశారు.
ఇదీ చూడండి:పక్షి దెబ్బకు విమానంలో మంటలు.. టేకాఫ్ అయిన వెంటనే ప్రమాదం.. లక్కీగా...
భర్త విలేజ్ సెక్రటరీ.. 'సర్పంచ్'గిరీ కోసం ముగ్గురు భార్యల రాజకీయం.. చివరకు..
