బంగాల్​, అసోంలో నేడు మోదీ ఎన్నికల ప్రచారం

ప్రధాని నరేంద్ర మోదీ నేడు బంగాల్​, అసోంలో ఎన్నికల ర్యాలీల్లో పాల్గొననున్నారు. ఈ నేపథ్యంలో ట్వీట్​ చేసిన మోదీ.. అసెంబ్లీ ఎన్నికల్లో ప్రజలు ఎన్​డీఏనే గెలవాలని కోరుకుంటున్నట్లు తెలిపారు.

బంగాల్​, అసోం రాష్ట్రాల ప్రజలు.. అసెంబ్లీ ఎన్నికల్లో ఎన్​డీఏ గెలవాలని కోరుకుంటున్నట్లు తెలిపారు ప్రధాని నరేంద్ర మోదీ. శనివారం ఈ రెండు రాష్ట్రాల్లో ఎన్నికల ప్రచారం నిర్వహించనున్న మోదీ.. ఒకరోజు ముందు ట్వీట్​ చేశారు.

బంగాల్​లోని ఖరగ్​పుర్​, అసోంలోని చబువాల్లో ఎన్నికల ర్యాలీల్లో పాల్గొననున్నారు. తన ప్రసంగాల్లో భాజపా అభివృద్ధి అజెండా గురించి విశదీకరిస్తానని పేర్కొన్నారు.

మోదీ ట్వీట్​

''మార్చి 20న ఖరగ్​పుర్​, చబువాల్లో ఎన్నికల ర్యాలీలకు హాజరవుతున్నా. నా ప్రసంగాల్లో భాజపా అభివృద్ధి అజెండా గురించి వివరిస్తా. రానున్న ఎన్నికల్లో ఎన్​డీఏనే గెలవాలని రెండు రాష్ట్రాల ప్రజలు ఆకాంక్షిస్తున్నట్లు స్పష్టమైంది.''

- నరేంద్ర మోదీ, ప్రధాన మంత్రి

ఇప్పటికే ఈ గురువారం అసోంలోని కరీంగంజ్​, బంగాల్​లోని పురులియాలో ప్రచారం నిర్వహించారు మోదీ.

అసోంలో తిరిగి గద్దెనెక్కాలని భావిస్తున్న భాజపా.. బంగాల్​లో తొలిసారి అధికారంలోకి రావాలని ఊవిళ్లూరుతోంది.

294 స్థానాలున్న బంగాల్​ అసెంబ్లీకి మార్చి 27- ఏప్రిల్​ 29 మధ్య 8 విడతల్లో ఎన్నికలు జరగనున్నాయి. అసోంలోని 126 నియోజకవర్గాలకు 3 దశల్లో పోలింగ్​ జరగనుంది.

మే 2న ఫలితాలు వెల్లడిస్తారు.

ఇదీ చూడండి: 'కాంగ్రెస్​ హయాంలో ఈశాన్య రాష్ట్రాలు నిర్లక్ష్యం'