పొరుగుదేశం అఫ్గానిస్థాన్లో ఆందోళనకరమైన పరిస్థితుల దృష్ట్యా కేంద్ర ప్రభుత్వం కీలక భేటీ నిర్వహించింది. ప్రధానమంత్రి నరేంద్ర మోదీ అధ్యక్షతన భద్రతా వ్యవహారాల కేబినెట్ కమిటీ(సీసీఎస్) సమావేశమైంది.
అఫ్గాన్లోని భారత పౌరులందరినీ సురక్షితంగా తీసుకురావాలని అధికారులను ప్రధాని ఆదేశించినట్లు తెలుస్తోంది. భారత్కు రావాలనుకుంటున్న అఫ్గానిస్థాన్ హిందువులు, సిక్కులకు ఆశ్రయం కల్పించాలని స్పష్టం చేసినట్లు సంబంధిత వర్గాలు తెలిపాయి.
"భారత్ సహాయాన్ని కోరే ప్రతి అఫ్గాన్ సోదరసోదరీమణులకు చేయూత అందించాలని మోదీ చెప్పారు. విదేశాంగ మంత్రి జైశంకర్ అమెరికా పర్యటనలో ఉన్న నేపథ్యంలో ఈ భేటీకి హాజరుకాలేకపోయారు. అఫ్గాన్లో ప్రస్తుత రాజకీయ పరిస్థితుల గురించి మోదీకి అధికారులు వివరించారు. భద్రతా పరమైన అంశాలపై సమాచారం అందించారు. రాయబార కార్యాలయం నుంచి సిబ్బందిని తరలించిన విషయాలనూ ప్రధాని దృష్టికి తీసుకెళ్లారు."
-అధికార వర్గాలు
రక్షణ మంత్రి రాజ్నాథ్ సింగ్, హోంమంత్రి అమిత్ షా, ఆర్థిక మంత్రి నిర్మలా సీతారామన్, జాతీయ భద్రతా సలహాదారు అజిత్ డోభాల్ ఈ భేటీకి హాజరయ్యారు. విదేశాంగ శాఖ కార్యదర్శి హర్షవర్ధన్ శ్రింగ్లా, మంగళవారమే దిల్లీకి చేరుకున్న అఫ్గాన్కు భారత రాయబారి రుద్రేంద్ర టాండన్ సైతం సమావేశంలో పాల్గొన్నారు.
తరలింపు పూర్తి..
అఫ్గాన్ను తాలిబన్లు ఆక్రమించుకున్న నేపథ్యంలో అక్కడ ఉన్న భారత దౌత్యవేత్తలను, అధికారులను ప్రభుత్వం వెనక్కి తీసుకొచ్చింది. 150 మందిని మిలిటరీ విమానంలో దిల్లీకి చేర్చింది. సోమవారం 40 మంది సిబ్బంది భారత్కు వచ్చారు. దీంతో కాబుల్ ఎంబసీ నుంచి సిబ్బంది తరలింపు ప్రక్రియ పూర్తైందని విదేశాంగశాక తెలిపింది. ఇక ఆ నగరంలో ఉంటున్న భారతీయుల వివరాలను సేకరిస్తున్నట్లు వెల్లడించింది. వారిని తీసుకొచ్చేందుకు ప్రయత్నిస్తున్నట్లు స్పష్టం చేసింది.
అఫ్గాన్ నుంచి సిబ్బందిని బయటకు తీసుకురావడం చాలా కష్టంతో కూడుకున్న పని అని విదేశాంగ మంత్రి జైశంకర్ అన్నారు. ఇందుకోసం సహకరించిన అందరికీ కృతజ్ఞతలు తెలిపారు. ప్రస్తుతం ఆయన నాలుగు రోజుల పర్యటన నిమిత్తం అమెరికాలో ఉన్నారు.
ఇదీ చదవండి:ఎట్టకేలకు స్పష్టత.. తాలిబన్లపై భారత్ వైఖరి ఇదే!
