దీర్ఘకాలిక రాబడిని పొందేందుకు భారత్ ఉత్తమమైన స్థానంగా పేర్కొన్నారు ప్రధానమంత్రి నరేంద్ర మోదీ. భారత్లో పెట్టుబడులు పెట్టాలని కోరారు. ఆత్మనిర్భర్ భారత్ అనేది కేవలం ఒక విజన్ మాత్రమే కాదని, ప్రణాళికబద్ధమైన ఆర్థిక వ్యూహమని పేర్కొన్నారు.
వర్చువల్ గ్లోబల్ ఇన్వెస్టర్ రౌండ్ టేబుల్ సమావేశం-2020లో ప్రసంగించారు మోదీ. ప్రపంచంలోనే అత్యల్ప కార్పొరేట్ పన్ను ఉన్న దేశం భారత్ అని సూచించారు.
"మీరు విశ్వసనీయతతో రాబడులు, ప్రజాస్వామ్యంతో డిమాండ్, స్థిరత్వం, సానుకూలతతో వృద్ధి కోరుకుంటే.. దానికి భారత్ తగిన స్థానం. భారతదేశం ప్రజాస్వామ్యం, జనాభా, డిమాండ్లతో పాటు వైవిధ్యాలను అందిస్తోంది. ఒకే మార్కెట్లో బహుళ మార్కెట్లను పొందటమే మా వైవిధ్యం. అవి బహుళ పాకెట్ సైజ్లో, బహుళ ప్రాధాన్యతలు, బహుళ వాతావరణ పరిస్థితులు, బహుళ స్థాయి అభివృద్ధి నుంచి వస్తాయి. భారత్ సాధించిన విజయాలు ప్రపంచ అభివృద్ధి, సంక్షేమంపై పలు రెట్లు ప్రభావాన్ని చూపుతాయి. "
- నరేంద్ర మోదీ, ప్రధానమంత్రి.
వైరస్తో పోరాడటం, ఆర్థిక స్థిరత్వాన్ని సాధించటంలో భారత్ గొప్ప పనితీరును కనబరిచిందన్నారు మోదీ. అది మన వ్యవస్థల బలం, ప్రజల మద్దతు సహా మన విధానాలతోనే సాధ్యమైందని సూచించారు. భారత జాతీయ స్వభావాన్ని, నిజమైన బలాన్ని యావత్ ప్రపంచ చూసిందని తెలిపారు. భారత్ను ప్రపంచ ఉత్పాదక శక్తి కేంద్రంగా మార్చడానికి మా వ్యాపారాల సామర్థ్యాలను, కార్మికుల నైపుణ్యాలను ఉపయోగించటమే లక్ష్యంగా పెట్టుకున్న వ్యూహం ఆత్మనిర్భర్ భారత్ అని వెల్లడించారు మోదీ.
ప్రపంచంలోనే అతిపెద్ద పెట్టుబడిదారులైన సావరిన్‌ వెల్త్‌ ఫండ్స్‌, పెన్షన్‌ ఫండ్స్‌ సహా అమెరికా, ఐరోపా, కెనడా, కొరియా, జపాన్‌, పశ్చిమాసియా, ఆస్ట్రేలియా, సింగపూర్‌ దేశాలకు చెందిన అగ్రశ్రేణి సంస్థాగత పెట్టుబడిదారులు ఇందులో పాల్గొన్నారు. వీటి అధీనంలో సుమారు 6 ట్రిలియన్ డాలర్ల నిధులు ఉన్నాయి. వీజీఐఆర్- 2020లో ప్రధానంగా భారత ఆర్థిక వ్యవస్థను 5 ట్రిలియన్ డాలర్లకు చేర్చటం, ఆర్థిక విధానాలు, సంస్కరణలు, పెట్టుబడులకు అవకాశాలపై చర్చించారు.
ఇదీ చూడండి: ఫిబ్రవరిలోనే కొవాగ్జిన్‌: ఐసీఎంఆర్‌
