'వచ్చే ఏడాది సరికొత్త శిఖరాలను అధిరోహిస్తాం'

కొత్త సంవత్సరంలో దేశం సమున్నత శిఖరాలను అధిరోహిస్తుందని ప్రధాని నరేంద్ర మోదీ ఆశాభావం వ్యక్తం చేశారు. కరోనా సంక్షోభ పరిస్థితులు అనేక పాఠాలు నేర్పించాయన్నారు. ఆర్థిక వేత్తలు కూడా అంచనా వేయలేని పరిస్థితులు తలెత్తాయని చెప్పారు. అయితే ఈ కాలంలో భారత్ మరిన్ని సామర్థ్యాలు పెంచుకుందన్నారు.

నూతన సంవత్సరంలో భారత్ సరికొత్త శిఖరాలను అధిరోహిస్తుందని ప్రధానమంత్రి నరేంద్ర మోదీ అన్నారు. ప్రపంచవ్యాప్తంగా భారత ప్రతిష్ఠ మరింత ఇనుమడిస్తుందని ఆశాభావం వ్యక్తం చేశారు. కరోనా సంక్షోభ పరిస్థితులు మనకు కొత్త పాఠాలు నేర్పించాయని పేర్కొన్నారు.

ఆకాశవాణి ద్వారా 72వ మన్​కీ బాత్ కార్యక్రమంలో పాల్గొన్న మోదీ.. కరోనా వల్ల ప్రపంచవ్యాప్తంగా గొలుసు సరఫరా వ్యవస్థలు నిర్వీర్యమయ్యాయన్నారు. ఆర్థికవేత్తలు కూడా అంచనా వేయలేని పరిస్థితులు వచ్చాయన్నారు. అయితే ఈ కాలంలో భారత్‌ మరిన్ని సామర్థ్యాలు పెంపొందించుకుందని తెలిపారు. ఈ సామర్థ్యాలనే 'ఆత్మనిర్భర్ భారత్​'గా అభివర్ణించారు.

'మార్పు వచ్చింది'

ప్రజలు వోకల్ ఫర్ లోకల్​ నినాదం అందిపుచ్చుకున్నారని, ఈ నేపథ్యంలో ప్రపంచ స్థాయి ఉత్పత్తులు తయారు చేసేలా పరిశ్రమలు చర్యలు తీసుకోవాలని ప్రధాని పిలుపునిచ్చారు. ప్రపంచంలో ఉత్తమమైనవి భారత్​లో తయారుకావాలని ఆకాంక్షించారు. ఇందుకోసం సంస్థలు, అంకురాలు ముందుకురావాలని అన్నారు.

"దేశ ప్రజల ఆలోచనల్లోనూ ఈ ఏడాది భారీ మార్పులు వచ్చాయి. భారత్​లో తయారైన ఆటవస్తువులే కావాలని వినియోగదారులు కోరుతున్నారు. ఒక్క ఏడాదిలోనే ప్రజల దృక్పథంలో మార్పు వచ్చిందనేందుకు ఇది ఉదహరణ. ఈ మార్పు అంత సులభం కాదు."

- నరేంద్ర మోదీ, ప్రధానమంత్రి

ఈ సందర్భంగా విదేశీ వస్తువుల స్థానంలో దేశీయ ఉత్పత్తులను వినియోగించాలని ప్రజలకు పిలుపునిచ్చారు మోదీ.

"రోజూ ఉపయోగించే వస్తువుల జాబితాను తయారుచేసుకోండి. అందులో విదేశాల నుంచి దిగుమతై మన జీవితంలో భాగమైన వాటిని గుర్తించండి. వాటికి భారతీయ ప్రత్యామ్నాయాలను వెతకండి. కష్టపడి తయారు చేసిన భారతీయుల ఉత్పత్తులను వినియోగించండి."

-నరేంద్ర మోదీ, ప్రధానమంత్రి

భారత్​లో వన్యప్రాణుల సంఖ్య గణనీయంగా పెరిగిందని గుర్తుచేశారు మోదీ. 2014-18 మధ్య చిరుతపులుల సంఖ్య 60 శాతం పెరిగి 12,852కి చేరిందని చెప్పారు. అదేవిధంగా సింహాలు, పులుల సంఖ్యలో కూడా వృద్ధి నమోదైందని అన్నారు. ప్రభుత్వాలతో పాటు స్వచ్ఛంద సంస్థలు, వ్యక్తులు వన్యప్రాణుల సంరక్షణ కోసం పాటుపడుతున్నారని తెలిపారు.

ఇదీ చదవండి:భారత్​లో భారీగా పెరిగిన చిరుతల సంఖ్య