Modi Meets President: రాష్ట్రపతి రామ్నాథ్ కోవింద్తో ప్రధాని నరేంద్ర మోదీ భేటీ అయ్యారు. పంజాబ్ పర్యటనలో భద్రతా లోపాలపై మాట్లాడారు. ఈ విషయంపై రామ్నాథ్ కోవింద్ తీవ్ర ఆందోళన వ్యక్తం చేసినట్లు రాష్ట్రపతి కార్యాలయం ప్రకటనలో తెలిపింది.
''రాష్ట్రపతి భవన్లో రాష్ట్రపతి రామ్నాథ్ కోవింద్.. ప్రధాని నరేంద్ర మోదీ భేటీ అయ్యారు. పంజాబ్లో తన పర్యటనలో భద్రతా లోపాలను ప్రధాని స్వయంగా రాష్ట్రపతి వద్ద ప్రస్తావించారు. ఈ అంశంపై రాష్ట్రపతి తీవ్ర ఆందోళన వ్యక్తం చేశారు.''
- రాష్ట్రపతి సచివాలయం ట్వీట్
సమావేశం అనంతరం ట్వీట్ చేసిన మోదీ.. తన గురించి ఆలోచించినందుకు రాష్ట్రపతికి కృతజ్ఞతలు తెలిపారు. ఆయన ఆశీస్సులు తనకు మరింత బలాన్ని చేకూరుస్తాయని అన్నారు.
వెంకయ్య ఆందోళన..
ప్రధాని మోదీ పంజాబ్ పర్యటనలో భద్రతా లోపాలు తలెత్తటంపై ఆందోళన వ్యక్తం చేశారు ఉపరాష్ట్రపతి వెంకయ్య నాయుడు. ఈ అంశంపై మోదీతో ఫోన్లో మాట్లాడినట్లు ట్విట్టర్ వేదికగా వెల్లడించారు. భవిష్యత్తులో ఇలాంటివి పునరావృతం కాకుండా భద్రతా చర్యలపై పఠిష్ఠ చర్యలు తీసుకుంటారని భావిస్తున్నట్లు తెలిపారు.
Modi Punjab Rally: పంజాబ్ పర్యటనకు బుధవారం వెళ్లిన మోదీకి అనూహ్య పరిస్థితి ఎదురైంది. తన కాన్వాయ్ ఫ్లైఓవర్పై 20 నిమిషాల పాటు ఆగిపోయింది. దీంతో ఆకస్మికంగా ర్యాలీని రద్దు చేసుకుని దిల్లీకి తిరుగుముఖం పట్టారు ప్రధాని. ఈ విషయం రాజకీయంగా తీవ్ర దుమారం రేపింది. పంజాబ్ ప్రభుత్వంపై భాజపా విమర్శలు గుప్పించింది.
పంజాబ్ ప్రభుత్వం మాత్రం.. ఎలాంటి భద్రతా లోపాలు తలెత్తలేదని, దీని వెనుక రాజకీయ ఉద్దేశమూ లేదని స్పష్టం చేశారు ముఖ్యమంత్రి చరణ్జిత్ సింగ్ చన్నీ. విచారణకు తమ ప్రభుత్వం సిద్ధంగానే ఉందని సీఎం పేర్కొన్నారు.
కమిటీ ఏర్పాటు..
ప్రధాని ఫిరోజ్ పుర్ పర్యటన సందర్భంగా ఏర్పడిన భద్రతా లోపాలపై.. పంజాబ్ ప్రభుత్వం ఇద్దరు సభ్యులతో ఉన్నతస్థాయి దర్యాప్తు బృందాన్ని ఏర్పాటు చేసింది.
