President elections 2022: రాష్ట్రపతి ఎన్నికల అభ్యర్థిగా అధికార పక్షం ఎవరిని బరిలోకి దించుతుందన్న ఉత్కంఠ మధ్య.. ఉపరాష్ట్రపతి వెంకయ్య నాయుడుతో భాజపా అగ్రనేతల భేటీ చర్చనీయాంశమైంది. దిల్లీలోని వెంకయ్య నివాసంలో కేంద్ర హోం మంత్రి అమిత్ షా, భాజపా అధ్యక్షుడు జేపీ నడ్డా, రక్షణ మంత్రి రాజ్నాథ్ సింగ్ సుమారు 50 నిమిషాల పాటు సమావేశమయ్యారు. రాష్ట్రపతి అభ్యర్థి ఏకగ్రీవంపై విపక్షాలతోనూ చర్చించేందుకు నడ్డా, రాజ్నాథ్లకు పార్టీ అధికారం ఇచ్చింది. రాష్ట్రపతి అభ్యర్థిని నిర్ణయించేందుకు సాయంత్రం భాజపా పార్లమెంటరీ బోర్డు భేటీ జరగడానికి ముందు.. వెంకయ్య ఇంట్లో ఈ సమావేశం ప్రాధాన్యం సంతరించుకుంది.
ఈ ఎన్నికల కోసం పలువురు కేంద్ర మంత్రులు, ముగ్గురు ప్రధాన కార్యదర్శులు సహా 14 మంది నేతలతో భాజపా ఇప్పటికే ఓ కమిటీని ఏర్పాటు చేసింది. ఈ కమిటీతో జేపీ నడ్డా ఆదివారం భేటీ అయ్యారు. రాష్ట్రపతి ఎన్నికల్లో ఎన్డీఏ అభ్యర్థిగా పలువురు పేర్లు ప్రధానంగా వినిపిస్తున్నాయి. అందులో ఉపరాష్ట్రపతి వెంకయ్య నాయుడు పేరు కూడా ఉంది. ఈ నేపథ్యంలోనే భాజపా సీనియర్లు.. ఆయనను కలిసినట్లు తెలుస్తోంది.
దాదాపు.. కొత్త రాష్ట్రపతి ఎన్నిక లాంఛనమే అయ్యే అవకాశం ఉంది. అధికార పార్టీకి ఎలక్ట్రోరల్ కాలేజీలో 48 శాతానికిపైగా మద్దతు ఉంది. దీంతో దాదాపు అభ్యర్థే విజయం సాధించే అవకాశాలు పుష్కలంగా ఉన్నాయి.