భార్య భుజాలపై ఎన్నికల విధులకు భర్త.. షాకిచ్చిన అధికారులు!

ఓ వైపు కాలికి గాయమై.. నడవలేని దుస్థితి. మరోవైపు ఎన్నికల విధులకు హాజరుకావాలనే ఆదేశాలు. ఎలాగైన కర్తవ్యాన్ని నిర్వర్తించాలనే ఆశయంతో భార్య భుజాలపై పోలింగ్ జరిగే ప్రాంతానికి చేరుకున్నాడు ఓ వ్యక్తి. ఈ సంఘటన ఝార్ఖండ్​లోని చత్రాలో జరిగింది.

ఝార్ఘండ్​లో పంచాయతీ ఎన్నికల సందర్భంగా ఆసక్తికర సంఘటన జరిగింది. చత్రా జిల్లాలో నడవలేక ఇబ్బంది పడుతున్న ఓ పోలింగ్​ కార్యకర్త.. భార్య భుజాలపై ఎన్నికల విధులకు హాజరయ్యారు. దీంతో అతడిని అందరూ ప్రశంసిస్తుండగా.. మరికొందరు అతడి భార్య ధైర్యాన్ని కొనియాడుతున్నారు..

చత్రా జిల్లాలో మూడు విడతల్లో జరగనున్న పంచాయతీ ఎన్నికల కోసం ఏర్పాట్లు జోరుగా సాగుతున్నాయి. ఈ క్రమంలోనే భార్య భుజాలపై చత్రా కాలేజీ ఆవరణలోకి చేరుకున్నాడు మనోజ్ ఉరావ్. సీసీఎల్ అశోక ఓసీపీలో సహాయకుడిగా పనిచేస్తున్నారు మనోజ్. ఇటీవలే కాలికి గాయమైనందు వల్ల అతడు నడవలేక ఇబ్బంది పడుతున్నారు. అయినప్పటికీ మనోజ్​కు ఎన్నికల డ్యూటీ విధించారు.

దీంతో విధులకు తప్పనిసరిగా హాజరుకావాలని మనోజ్ భావించారు. అయితే అక్కడికి ఎలా చేరుకుంటారనేదే ప్రశ్న? అందుకు సమాధానంగా నిలిచారు అతడి భార్య. భర్త విధుల కోసం ఆమె ముందుకొచ్చారు. అతడిని భుజాలపై కాలేజ్ క్యాంపస్​కు మోసుకొచ్చారు.

అయితే మనోజ్​ను పోలింగ్​ విధులకు హాజరు కానివ్వలేదు అధికారులు. మెడికల్​ బోర్డ్​ బందం.. అతడిని అనర్హుడిగా ప్రకటించింది. విశ్రాంతి తీసుకోవాలని సూచించింది. అయితే.. పని పట్ల మనోజ్, అతడి భార్య అంకితభావం పట్ల అక్కడున్న వారందరూ వారిని కొనియాడుతున్నారు. ఇలాంటి పరిస్థితిలో ఉన్న వ్యక్తికి డ్యూటి ఎందుకు వేశారనే ప్రశ్న కూడా ఎదురవుతోంది.

ఇదీ చూడండి:త్రిపుర ముఖ్యమంత్రి బిప్లవ్​ కుమార్​ రాజీనామా