Rajasthan Polling Date Change :రాజస్థాన్ అసెంబ్లీ ఎన్నికల పోలింగ్ తేదీ మారింది. నవంబరు 23న జరగాల్సిన పోలింగ్ను అదే నెల 25వ తేదీన నిర్వహిస్తామని ఎన్నికల అధికారులు ప్రకటించారు. కౌంటింగ్ యథావిథిగా డిసెంబర్ 3న జరగనున్నట్లు తెలిపారు. ముందు అనుకున్న తేదీన పెద్ద ఎత్తున వివాహాలు ఉండడమే పోలింగ్ తేదీని మార్చామని చెప్పారు.
Rajasthan Polling Date 2023 : అయితే అక్టోబర్ 9వ తేదీన కేంద్ర ఎన్నికల సంఘం.. రాజస్థాన్ సహా ఐదు రాష్ట్రాలఎన్నికల తేదీలను ప్రకటించింది. నవంబరు 23న రాజస్థాన్లో పోలింగ్ నిర్వహించనున్నట్లు తెలిపింది. మిగత నాలుగు రాష్ట్రాలతోపాటు కౌంటింగ్ను డిసెంబర్ 3న చేపట్టనున్నట్లు చెప్పింది. అయితే నవంబరు 23వ తేదీన రాజస్థాన్లో దేవ్ ఉథాని ఏకాదశి సందర్భంగా పెద్ద ఎత్తున వివాహాలు జరగనున్నాయి. అందుకోసం ఇప్పటికే వధూవరుల కుటుంబసభ్యులు ఏర్పాట్లు పూర్తి చేసుకున్నారు. దీంతో ఓటింగ్పై భారీగా ప్రభావం పడుతుందని పలు రాజకీయ పార్టీలు, స్వచ్ఛంద సంస్థలు ఆందోళన వ్యక్తం చేశాయి. పోలింగ్ తేదీని మార్చాలని పెద్ద ఎత్తున ఎన్నికల సంఘానికి విజ్ఞప్తి చేశాయి. దీంతో ఎన్నికల సంఘం.. పోలింగ్ డేట్ను మార్చుతున్నట్లు ప్రెస్నోట్ విడుదల చేసింది. పోలింగ్ తేదీ తప్ప మిగతా తేదీల్లో మార్పులు లేవని చెప్పింది.
Rajasthan Election Schedule :రాజస్థాన్ ఎన్నికల షెడ్యూల్ ఇదే..
- నోటిఫికేషన్ విడుదల తేదీ: అక్టోబర్ 30
- నామినేషన్ల స్వీకరణకు తుది గడువు: నవంబర్ 6
- నామినేషన్ల పరిశీలన: నవంబర్ 7
- నామినేషన్ల ఉపసంహరణ గడువు: నవంబర్ 9
- రాజస్థాన్ అసెంబ్లీ ఎన్నికల పోలింగ్ తేదీ: నవంబర్ 25
- రాజస్థాన్ ఎన్నికల ఫలితాల తేదీ: డిసెంబర్ 3
- మొత్తం ఓటర్లు: 5.25 కోట్లు