politicians congratulates RRR team : ఆర్ఆర్ఆర్ చిత్రంలోని నాటు నాటు పాట ఆస్కార్ అవార్డ్ గెలుచుకుంది. ఈ క్రమంలోనే సినీ, రాజకీయప్రముఖులు నుంచి ప్రశంసలు వెలువెత్తుతున్నాయి. రాజమౌళి బృందానికి ప్రధాని మోదీ అభినందనలు తెలిపారు. నాటు నాటుకు ఆస్కార్‌తో భారత్‌ గర్వపడుతోందని వివరించారు. కీరవాణి, చంద్రబోస్‌కు అభినందనలని తెలియజేశారు. నాటునాటు పాట ప్రపంచమంతా పేరు తెచ్చుకుందని.. ఈ పాటను ఏళ్ల తరబడి స్మరించుకుంటారుని ప్రధాని మోదీ స్పష్టం చేశారు.
నాటు నాటు పాటకు ఆస్కార్ దక్కడం అభినందనీయం: నాటు నాటు పాటకు ఆస్కార్ దక్కడం అభినందనీయమని మాజీ ఉప రాష్ట్రపతి వెంకయ్యనాయుడు పేర్కొన్నారు. చిత్ర బృందానికి హృదయపూర్వక శుభాకాంక్షలు తెలుపుతూ ఆయన ట్వీట్ చేశారు. తెలుగు సినిమాకు తొలి ఆస్కార్ అవార్డును అందించిన ఆర్ఆర్ఆర్ చిత్ర యూనిట్‌కు కేంద్రమంత్రి కిషన్రెడ్డి హృదయపూర్వక అభినందనలు తెలిపారు. తెలుగు సినిమా స్థాయిని మరోసారి ప్రపంచానికి చాటి చెప్పిన.. ఈ సినిమాలోని ‘నాటు నాటు’ పాట..‘బెస్ట్ ఒరిజినల్ సాంగ్’ విభాగంలో ఆస్కార్ అందుకోవడం తెలుగువారందరికీ గర్వకారణమని వివరించారు. తెలుగు వెండితెర ఇలాంటి మరిన్ని అద్భుతమైన చిత్రాలతో అంతర్జాతీయ ఖ్యాతిని అందుకోవాలని మనస్ఫూర్తిగా కోరుకుంటున్నానని అన్నారు. విశ్వ వేదికపై భారతీయ సినిమాకి దక్కిన మరో గొప్ప గౌరవమని కిషన్రెడ్డి వెల్లడించారు.
నాటు నాటు' గీతం తెలంగాణ సంస్కృతికి అద్దం పట్టింది: నాటు నాటు పాటకు ఆస్కార్ రావడం పట్ల సీఎం కేసీఆర్ హర్షం వ్యక్తం చేశారు. ఇది తెలుగువారిగా మనందరికీ గర్వకారణమని వివరించారు. విశ్వ సినీ యవనికపై తెలుగు సినిమా సత్తా చాటిందని స్పష్టం చేశారు. 'నాటు నాటు' గీతం తెలంగాణ సంస్కృతికి అద్దం పట్టిందని తెలిపారు. ఈ గీతం తెలుగు ప్రజల అభిరుచికి నిదర్శనమని అన్నారు. తెలుగులోని మట్టి వాసనలను చంద్రబోస్‌ వెలుగులోకి తెచ్చారని చెప్పారు. కీరవాణి, చంద్రబోస్‌ సహా రాజమౌళి బృందానికి అభినందనలని వెల్లడించారు. హాలీవుడ్‌కు తీసిపోని విధంగా తెలుగు చిత్రాలు రూపొందడం గొప్ప విషయమని వ్యాఖ్యానించారు. తెలుగు సినిమా కీర్తి దిగంతాలకు వ్యాపించిందన్నారు. నాటునాటుకు ఆస్కార్ తెలుగు నేలకే కాదు దేశానికి గర్వకారణమని కేసీఆర్ కితాబిచ్చారు.
భారతీయ సినిమాను అంతర్జాతీయ స్థాయికి చేర్చారు: ఆస్కార్ సాధించిన కీరవాణి, రాజమౌళి బృందానికి ముఖ్యమంత్రి జగన్ అభినందనలు తెలిపారు. నాటునాటు పాట సంగీత అభిమానులను అలరించిందని వివరించారు. భారతీయ సినిమాను అంతర్జాతీయ స్థాయికి చేర్చారని ఆయన వెల్లడించారు.
ఆస్కార్‌తో భారతీయులు, తెలుగు సినిమా గర్వించేలా చేశారు: ఆర్ఆర్ఆర్ బృందానికి గవర్నర్ తమిళిసై సౌందర రాజన్ శుభాకాంక్షలు తెలిపారు. ఆస్కార్‌తో భారతీయులు, తెలుగు సినిమా గర్వించేలా చేశారని ఆమె పేర్కొన్నారు. ఆర్‌ఆర్‌ఆర్‌కి ఆస్కార్ రావడం పట్ల రాష్ట్ర మంత్రులు ప్రశంసలు కురిపించారు. రాజమౌళి దేశాన్ని గర్వపడేలా చేశారని మంత్రి కేటీఆర్ అన్నారు. చరిత్ర సృష్టించిన కీరవాణి, చంద్రబోస్‌కు అభినందనలని వివరించారు. రామ్‌చరణ్‌, ఎన్టీఆర్‌ నృత్య కౌశలం అందరిని కదిలించిందని కేటీఆర్ స్పష్టం చేశారు.