సోమవారం రోజున చంద్రమోహన్ అంత్యక్రియలు - సీఎం కేసీఆర్ సహా రాజకీయ ప్రముఖుల ప్రగాఢ సంతాపం

Political leaders Condolence to Senior Actor Chandramohan : సీనియర్ నటులు చంద్రమోహన్​ పార్థివదేహాన్ని రెండు రోజుల పాటు ఫిల్మ్​నగర్​లోని నివాసంలో ఉంచనున్నారు. అమెరికాలో ఉన్న చిన్న కుమార్తె వచ్చిన తర్వాత సోమవారం అంత్యక్రియలు నిర్వహించనున్నారు. మరోవైపు.. ఆయన మృతి పట్ల సీఎం కేసీఆర్, వైఎస్​ జగన్​మోహన్​రెడ్డి సహా పలువురు రాజకీయ ప్రముఖులు సంతాపం తెలిపారు.

Political leaders Condolence to Senior Actor Chandramohan: హైదరాబాద్​ అపోలో ఆస్పత్రిలో చికిత్స పొందుతూ మృతి చెందిన టాలీవుడ్​ సీనియర్​ నటులు చంద్రమోహన్ పార్థివదేహాన్ని ఫిల్మ్​నగర్​లోని నివాసానికి తరలించారు. భౌతికకాయాన్ని నేడు, రేపు ఇంట్లోనే ఉంచనున్న కుటుంబసభ్యులు.. సోమవారం మధ్యాహ్నం తర్వాత అంత్యక్రియలు నిర్వహించనున్నారు. అమెరికాలో ఉన్న చిన్న కుమార్తె మధుర మీనాక్షి రావాల్సి ఉన్నట్లు కుటుంబీకులు తెలిపారు.

CM KCR TRIBUTE TO CHANDRAMOHAN : ఇదిలా ఉండగా.. చంద్రమోహన్ మృతి పట్ల సీఎం కేసీఆర్, జగన్ సహా పలువురు రాజకీయ ప్రముఖులు సంతాపం తెలిపారు. విభిన్నమైన పాత్రలు, విలక్షణమైన నటన, దశాబ్దాలుగా కోట్లాది మంది ప్రేక్షకులను అలరించిన చంద్రమోహన్ మరణం... తెలుగు చిత్ర సీమకు తీరనిలోటని ముఖ్యమంత్రి కేసీఆర్ విచారం వ్యక్తం చేశారు. చంద్రమోహన్ స్ఫూర్తితో ఎందరో నటీనటులు ఉన్నత స్థాయికి ఎదిగారని, కళామతల్లి ముద్దుబిడ్డగా తెలుగుతో పాటు పలు భాషల్లో లక్షలాది మంది అభిమానాన్ని సొంతం చేసుకున్నారని ఆయన తెలిపారు. శోకతప్తులైన చంద్రమోహన్ కుటుంబ సభ్యులకు కేసీఆర్ తన ప్రగాఢ సానుభూతి తెలిపారు.

చంద్రమోహన్​ మరణం బాధాకరమని ఏపీ ముఖ్యమంత్రి జగన్ విచారం వ్యక్తం చేశారు. తొలి సినిమాకే నంది అవార్డును అందుకున్న ఆయన.. తెలుగు, తమిళ భాషల్లో వందలాది చిత్రాల్లో నటించి ప్రేక్షకుల హృదయాల్లో చెరగని ముద్ర వేశారని తెలిపారు. ఆయన ఆత్మకు శాంతి కలగాలని మనస్ఫూర్తిగా కోరుకుంటున్నానన్నారు. చంద్రమోహన్ పరమపదించారని తెలిసి ఎంతో విచారించానన్న మాజీ ఉప రాష్ట్రపతి వెంకయ్యనాయుడు.. నాటి చిత్రాలు మొదలుకొని, నిన్న మొన్నటి చిత్రాల వరకు నటుడిగా వారి ప్రాధాన్యత ఎనలేనిదని కొనియాడారు.

తెలుగు సినీ చరిత్రలో ప్రత్యేక గుర్తింపు తెచ్చుకున్న విలక్షణ నటుడు చంద్రమోహన్​ అని కేంద్రమంత్రి, బీజేపీ రాష్ట్ర అధ్యక్షుడు కిషన్​రెడ్డి గుర్తు చేసుకున్నారు. ఆయన మృతి చెందారన్న వార్త తెలిసి విచారం వ్యక్తం చేస్తున్నానన్న ఆయన.. కుటుంబ కథా చిత్రాలంటే చంద్రమోహన్ అన్నట్లుగా సాగిన వారి సినీ ప్రస్థానం యువ నటీనటులకు ఆదర్శమన్నారు. ఆయన ఆత్మకు శాంతి చేకూరాలని ప్రార్థిస్తూ.. కుటుంబసభ్యులకు ప్రగాఢ సానుభూతి తెలియజేస్తున్నానన్నారు.

చంద్రమోహన్ మృతి పట్ల మంత్రులు కేటీఆర్, హరీశ్​రావు, టీపీసీసీ అధ్యక్షులు రేవంత్​రెడ్డి తీవ్ర విచారం వ్యక్తం చేశారు. ఆయన మృతి తెలుగు చిత్రసీమకు తీరని లోటన్నారు. మరోవైపు.. టీడీపీ జాతీయ ప్రధాన కార్యదర్శి లోకేశ్, నటుడు, ఏపీలోని హిందూపురం ఎమ్మెల్యే నందమూరి బాలకృష్ణ సైతం చంద్రమోహన్​ మృతికి సంతాపం తెలిపారు. పౌరాణిక, కుటుంబ చిత్రాలతో చంద్రమోహన్ అలరించారని బాలయ్య గుర్తు చేసుకోగా.. చంద్రమోహన్‌ తన నటనతో తెలుగు వారి హృదయాల్లో చెరగని ముద్ర వేశారని లోకేశ్ అన్నారు. ఆయన కుటుంబసభ్యులకు ప్రగాఢ సానుభూతి తెలిపారు.