సీఎం రేవంత్​కు శుభాకాంక్షల వెల్లువ - రాష్ట్ర ప్రగతికి అన్ని విధాలా తోడ్పాటు అందిస్తామన్న ప్రధాని మోదీ

Political Celebrities Wishes to CM Revanth Reddy : రేవంత్‌ రెడ్డి సారథ్యంలో ఏర్పడిన నూతన కాంగ్రెస్‌ ప్రభుత్వానికి ప్రముఖుల నుంచి అభినందనలు వెల్లువెత్తాయి. ప్రధాని మోదీ, గవర్నర్‌ తమిళిసై, రాహుల్‌ గాంధీ, ఏపీ సీఎం జగన్‌, చంద్రబాబు నాయుడు, మాజీ ఉపరాష్ట్రపతి వెంకయ్య నాయుడు, హరీశ్‌రావు, నారా లోకేశ్‌ సహా పలువురు కొత్త సర్కార్‌కు శుభాకాంక్షలు తెలిపారు. ప్రజా ఆకాంక్షలకు అనుగుణంగా పాలన సాగించాలని ఆకాంక్షించారు.

Political Celebrities Wishes to CM Revanth Reddy : తెలంగాణ నూతన ముఖ్యమంత్రిగా ప్రమాణ స్వీకారం చేసిన రేవంత్ రెడ్డికి ప్రధానమంత్రి మోదీ సహా పలువురు రాజకీయ ప్రముఖులు శుభాకాంక్షలు తెలిపారు. రాష్ట్రంలో ప్రజా పాలన విజయవంతంగా కొనసాగించాలని ఆకాంక్షించారు. ఈ మేరకు ఎక్స్ (ట్విటర్) వేదికగా ట్వీట్ చేశారు.

అన్ని విధాలా తోడ్పాటు: తెలంగాణ ముఖ్యమంత్రిగా ప్రమాణ స్వీకారం చేసిన రేవంత్ రెడ్డికి ప్రధాని మోదీ అభినందనలు తెలిపారు. రాష్ట్ర ప్రగతికి, పౌరుల సంక్షేమానికి అన్ని విధాలా తోడ్పాటు అందిస్తానని హామీ ఇస్తున్నానన్నారు. ఈ మేరకు మోదీ ఎక్స్ వేదికగా పేర్కొన్నారు. తెలంగాణ ముఖ్యమంత్రిగా రేవంత్ రెడ్డికి, మంత్రులుగా ప్రమాణ స్వీకారం చేసిన వారందరికీ గవర్నర్ తమిళిసై సౌందరరాజన్ శుభాకాంక్షలు తెలిపారు. రాష్ట్రాన్ని ప్రధాని మోదీ బాటలో అన్ని విధాలా అభివృద్ధి చేసి, గొప్ప విజయాలను అందుకోవాలని కోరుకుంటున్నానని తెలిపారు.

తెలుగు రాష్ట్రాల మధ్య సోదరభావం ఫరిడవిల్లాలి: తెలంగాణ నూతన సీఎం రేవంత్ రెడ్డికిఆంధ్రప్రదేశ్ ముఖ్యమంత్రి జగన్ మోహన్​రెడ్డి శుభాకాంక్షలు తెలిపారు. రాష్ట్రంలో కొలువుదీరిన కొత్త ప్రభుత్వానికి అభినందనలు తెలియజేశారు. రెండు తెలుగు రాష్ట్రాల మధ్య సోదరభావం, సహకారం పరిఢవిల్లాలని ఆకాంక్షించారు. సీఎం రేవంత్ రెడ్డికి శుభాకాంక్షలు తెలిపిన మాజీ ఉప రాష్ట్రపతి వెంకయ్య నాయుడు, రాష్ట్రంలోని అన్ని పక్షాలను కలుపుకుని వెళ్లాలని సూచించారు. ప్రజల ఆకాంక్షాల మేరకు పని చేయాలని తెలిపారు. ప్రజా శ్రేయస్సు, అభివృద్ధే లక్ష్యంగా పాలన కొనసాగించాలని పేర్కొన్నారు.

హామీల అమలు దిశగా పని చేయాలి: రాష్ట్ర ముఖ్యమంత్రిగా ప్రమాణ స్వీకారం చేసిన రేవంత్ రెడ్డికి, ఉప ముఖ్యమంత్రి భట్టి విక్రమార్క, మంత్రులుగా ప్రమాణం చేసిన వారందరికీ మాజీ మంత్రి, సిద్దిపేట ఎమ్మెల్యే హరీశ్​రావు హృదయ పూర్వక శుభాకాంక్షలు తెలియజేశారు. ఎన్నికల సమయంలో ఇచ్చిన హామీల అమలు దిశగా కాంగ్రెస్ ప్రభుత్వం పని చేయాలని ఆకాంక్షిస్తున్నానని తెలిపారు. ఈ మేరకు హరీశ్​రావు ట్వీట్ చేశారు.

తెలంగాణ ముఖ్యమంత్రిగా ప్రమాణ స్వీకారం చేసిన సీఎం రేవంత్ రెడ్డికి టీడీపీ అధినేత చంద్రబాబు నాయుడు శుభాకాంక్షలు తెలిపారు. ప్రజలకు మెరుగైన సేవలందిచాలని కోరారు. రేవంత్ పరిపాలన ప్రజారంజకంగా కొనసాగాలని, ప్రజాసేవ చేసే దిశగా రేవంత్ భవిష్యత్తు విజయవంతం కావాలని ఆకాంక్షించారు. రేవంత్ రెడ్డికి శుభాకాంక్షలు తెలిపిన జనసేన అధినేత పవన్ కల్యాణ్, రాష్ట్ర సాధన కోసం అమరలైన యువత ఏ ఆశయాల కోసం ఆత్మ బలిదానాలు చేసిందో వాటిని సంపూర్ణంగా నేరవెర్చి ఆ త్యాగాలకు గౌరవాన్ని, సార్థకతను కల్పించాలని కోరారు.