వారణాసిలో 614 కోట్ల అభివృద్ధి పనులకు మోదీ శ్రీకారం

వారణాసిలో పలు అభివృద్ధి పనులకు ఇవాళ శ్రీకారం చుట్టనున్నారు ప్రధాని నరేంద్ర మోదీ. వీటి కోసం 614 కోట్లు కేటాయించినట్లు ప్రధానమంత్రి కార్యాలయం తెలిపింది. నేడు జరగనున్న ఈ వర్చువల్​ కార్యక్రమంలో ఉత్తర్​ప్రదేశ్​ సీఎం యోగి ఆదిత్యనాథ్​ కూడా పాల్గొననున్నారు.

ప్రధాని నరేంద్ర మోదీ.. ఉత్తర్​ప్రదేశ్​ వారణాసిలో పలు అభివృద్ధి కార్యక్రమాలకు సోమవారం శంకుస్థాపన చేయనున్నారు. వ్యవసాయం, పర్యాటక, మౌలిక వసతుల కల్పనకు సంబంధించిన తదితర కార్యక్రమాలను ఆయన వర్చువల్​గా ప్రారంభించనున్నారు. ఈ విషయాలను మోదీ తన ట్విట్టర్​ ద్వారా వెల్లడించారు.

"వారణాసి పట్టణాభివృద్ధికి సంబంధించి కీలకమైన ఘట్టం సోమవారం ఆవిష్కృతం కానుంది. సోమవారం ఉదయం 10:30 నిమిషాలకు నేను వీడియో కాన్ఫరెన్స్​ ద్వారా చాలా ప్రాజెక్టులను ప్రారంభించనున్నాను. వీటిలో వ్యవసాయం, పర్యాటకం, మౌలిక వసతులకు చెందిన అభివృద్ధి పనులు ఉన్నాయి".

--ప్రధాని మోదీ

ప్రారంభోత్సవ కార్యక్రమంలో భాగంగా ప్రాజెక్టులకు సంబంధించిన అర్హులతోనూ ప్రధాని ముచ్చటిస్తారని తెలిపింది ప్రధానమంత్రి కార్యాలయం.

ప్రాజెక్టులు ఇవే

సార్​నాథ్​ లైట్​ అండ్​ సౌండ్​ ప్రదర్శనశాల, రామ్​నగర్​లోని లాల్​ బహదూర్​ శాస్త్రి ఆసుపత్రి పునరుద్ధరణ, నగరంలో డ్రైనేజీ వ్యవస్థకు సంబంధించిన ప్రాజెక్టులు, విత్తనాల స్టోరేజీ కేంద్రం, సంపూర్ణానంద్​ స్టేడియం శంకుస్థాపన, 105 అంగన్​వాడీ కేంద్రాలు, 102 గోవు సంరక్షణ కేంద్రాలు, పలు ఘాట్​ల నిర్మాణానికి సంబంధించిన ప్రాజెక్టులను ప్రధాని ప్రారంభించనున్నారు.