కశ్మీర్​-దిల్లీ దూరానికి ముగింపు పలకాలి: మోదీ

జమ్ముకశ్మీర్​లో సరిహద్దు నిర్ణయించే ప్రక్రియ త్వరగా పూర్తై.. ఎన్నికలు జరగాలను కోరుకుంటున్నానని ప్రధానమంత్రి నరేంద్ర మోదీ తెలిపారు. గురువారం దిల్లీలో గుప్కార్ నేతలతో సమావేశం అనంతరం ఆయన ఈ మేరకు పేర్కొన్నారు. మరోవైపు.. ఈ సమావేశంలో పాల్గొన్న అఖిలపక్ష నేతలు.. ఆర్టికల్​ 370ని పునరుద్ధరించాల్సిందేనని డిమాండ్​ చేశారు

గుప్కార్​ నేతలో నిర్వహించిన సమావేశం.. అభివృద్ధి ప్రగతిశీల జమ్ముకశ్మీర్​ నిర్మాణం కోసం చేస్తున్న ప్రయత్నాల్లో కీలకమైన ముందడుగు అని ప్రధానమంత్రి నరేంద్ర మోదీ(PM Modi) పేర్కొన్నారు. జమ్ముకశ్మీర్​లో సరిహద్దులను నిర్ణయించే ప్రక్రియ త్వరగా పూర్తై.. ఎన్నికలు జరగాలని కోరుకుంటున్నట్లు చెప్పారు. గురువారం దిల్లీలో గుప్కార్​ కూటమి నేతలతో భేటీ(PM Modi meets JK leaders) అనంతరం ఆయన ఈమేరకు ట్విట్టర్​ వేదికగా పేర్కొన్నారు.

"జమ్ముకశ్మీర్​ నేతలో నేటి సమావేశం అభివృద్ధి, ప్రగతి శీల జమ్ముకశ్మీర్​ నిర్మాణం కోసం చేస్తున్న ప్రయత్నాలలో కీలకమైన ముందడుగు. జమ్ముకశ్మీర్​లో ప్రజాస్వామ్యాన్ని బలోపేతం చేయటమే మా ప్రాధాన్యం. సరిహద్దుల నిర్ణయించే ప్రక్రియ త్వరగా పూర్తి కావాలి. దాంతో అక్కడి ప్రజలు తమ ప్రభుత్వాన్ని ఎన్నుకుంటారు. తద్వారా జమ్మకశ్మీర్​ అభివృద్ధి చెందుతుంది. "

-ప్రధాన మంత్రి నరేంద్ర మోదీ.

అంతకుముందు సమావేశంలో భాగంగా.. రాజకీయంగా విభేదాలు ఉన్నప్పటికీ ప్రతి ఒక్కరూ జాతి ప్రయోజనాల కోసం, జమ్ముకశ్మీర్ అభివృద్ధి కోసం పనిచేయాలని కోరారు మోదీ. 'దిల్లీకి దూరీ, దిల్​కి దూరీ' నినాదం చేస్తూ కశ్మీర్​- దిల్లీ దూరానికి, హృదయాల మధ్య దూరానికి ముగింపు పలకాలి అనుకుంటున్నట్టు వెల్లడించారు.

ఆ రెండూ కీలకం..

నియోజకవర్గాలు నిర్ణయించే ప్రక్రియ పూర్తవటం, శాంతి పూర్వకంగా ఎన్నికలు జరగటం.. జమ్ముకశ్మీర్​ రాష్ట్ర హోదా పునురుద్ధరించే ప్రక్రియలో కీలకమైన అంశాలని కేంద్ర హోం మంత్రి అమిత్​ షా పేర్కొన్నారు.

"జమ్ముకశ్మీర్​ సర్వతోముఖాభివృద్ధికి మేము కట్టుబడి ఉన్నాం. జమ్ముకశ్మీర్​ భవిష్యత్తు గురించి మేం చర్చించాం. పార్లమెంటులో వాగ్దానం చేసినట్లు జమ్ముకశ్మీర్​కు రాష్ట్ర హోదాను తిరిగి కల్పించటంలో నియోజకవర్గాలను నిర్ణయించే ప్రక్రియ పూర్తవటం, ప్రశాంతంగా ఎన్నికలు జరగటం కీలకమైన మైలురాళ్లు."

-అమిత్​ షా, కేంద్ర హోం మంత్రి.

2019 ఆగస్టు 5న జమ్మకశ్మీర్​కు స్వయంప్రతిపత్తిని కేంద్రం రద్దు చేసింది. ఆ రాష్ట్రాన్ని రెండు కేంద్ర పాలిత ప్రాంతాలుగా విభజించింది. దీంతో జమ్ముకశ్మీర్​లో రాజకీయ ప్రతిష్టంభన ఏర్పడింది. ఆర్టికల్​ 370(Article 370) రద్దు తర్వాత అక్కడి నేతలతో ప్రధాని సమావేశం కావడం ఇదే తొలిసారి. దాదాపు మూడున్నర గంటలపాటు ఆయన ఈ సమావేశం నిర్వహించారు.

గుప్కార్​ నేతలతో సమావేశంలో మోదీ

పునరుద్ధరించాల్సిందే..

రాజ్యాంగ విరుద్ధంగా కేంద్రం ఆర్టికల్​ 370ని రద్దు చేసిన కేంద్ర ప్రభుత్వ చర్యను జమ్ముకశ్మీర్​ ప్రజలు అంగీకరించరని ఈ సమావేశంలో మోదీకి తాను చెప్పానని పీడీపి అధినేత్రి మెహబూబా ముఫ్తీ తెలిపారు. నెలలు లేదా సంవత్సరాలు సమయం పట్టినా.. ఆర్టికల్​ 370ని పునరుద్ధరించాల్సిందేనని ఆమె డిమాండ్ చేశారు. పాకిస్థాన్​తో కాల్పుల విరమణ ఒప్పందాన్ని కుదుర్చుకున్నందుకు ప్రభుత్వాన్ని అభినందిస్తున్నట్లు తెలిపారు. అదే సమయంలో వాణిజ్య విషయంలో కూడా ఆ దేశంతో మాట్లాడాలని కోరారు.

మోదీ ఏం మాట్లాడలేదు..

జమ్ముకశ్మీర్​కు జరిగిన అన్యాయంపై తాము న్యాయవ్యవస్థ ద్వారా పోరాడుతామని ఎన్​సీ నేత ఒమర్​ అబ్దుల్లా తెలిపారు. రాష్ట్రానికి కేంద్రానికి మధ్య ఏర్పడిన దూరాన్ని తగ్గించే బాధ్యత కేంద్రానిదేనని అన్నారు. ఎన్నికలు, రాష్ట్రా హోదాను పనురుద్ధరిస్తామని ప్రధాని మోదీ, అమిత్​ షా చెప్పారని పేర్కొన్నారు. అయితే.. రాష్ట్ర హోదాను పునురుద్ధరించిన తర్వాతే ఎన్నికలు నిర్వహించాలని ఆజాద్​ చేసిన డిమాండ్​పై మోదీ ఏమీ మాట్లాడలేదని తెలిపారు.

సమావేశంలో పాల్గొన్న గులాబ్​ నబీ ఆజాద్​, ఫరూక్​ అబ్దుల్లాతో పాటు ఇతర జమ్ముకశ్మీర్​ నేతలు తమ అభిప్రాయాలను మోదీతో పంచుకున్నారు.