కేంద్రంలోని ఎన్డీఏ ప్రభుత్వం, బీజేపీ పాలిత రాష్ట్రాల్లో యువతకు ఉద్యోగాలు ఇచ్చే కార్యక్రమం వేగంగా సాగుతున్నట్లు ప్రధాని నరేంద్ర మోదీ తెలిపారు. స్టార్టప్లు దేశంలో 40 లక్షలకుపైగా ఉద్యోగాలను సృష్టించాయని అన్నారు మోదీ. బుధవారం మధ్యప్రదేశ్లో 22వేల మంది ఉపాధ్యాయులకు నియామకపత్రాలు అందజేసినట్లు చెప్పారు. వీడియో కాన్ఫరెన్స్ ద్వారా గురువారం జరిగిన జాతీయ రోజ్ గార్ మేళాలో పాల్గొన్న ప్రధాని మోదీ.. కేంద్ర ప్రభుత్వ విభాగాల్లో 71 వేల మందికి ఉద్యోగ నియామకపత్రాలు అందజేశారు. దేశంలో అమలు చేస్తున్న సరికొత్త విధానాలు, వ్యూహాలతో.. కొత్త అవకాశాలకు ద్వారాలు తెరుచుకున్నట్లు ప్రధాని మోదీ తెలిపారు. ఎన్డీఏ ప్రభుత్వం సాంకేతికత, మౌలిక సదుపాయాలకు ప్రాధాన్యం ఇస్తోందని, గత ప్రభుత్వాలు అందుకు భిన్నంగా పనిచేశాయని పరోక్షంగా కాంగ్రెస్‌ను విమర్శించారు.
భారత్.. ప్రపంచంలోనే అత్యంత వేగంగా అభివృద్ధి చెందుతున్న ఆర్థిక వ్యవస్థగా కొనసాగుతోంది. కరోనా తర్వాత ప్రపంచమంతా ఆర్థిక మాంద్యం పరిస్థితులు నెలకొన్నాయి. చాలా దేశాల ఆర్థిక వ్యవస్థలు పతనమవుతున్నాయి. ఈ పరిణామాల మధ్య ప్రపంచమంతా భారత్‌ను వేగుచుక్కలా చూస్తున్నాయి. నేటి భారతం సరికొత్త విధానాలు, వ్యూహాలతో సాగుతోంది. ఫలితంగా దేశంలో కొత్త అవకాశాలకు ద్వారాలు తెరుచుకున్నాయి.
--నరేంద్ర మోదీ, ప్రధాని