కరోనా 2.0: 'ఈ 5 నియమాలు తప్పనిసరి'

దేశవ్యాప్తంగా కొవిడ్ ఉద్ధృతి పెరుగుతున్న నేపథ్యంలో ప్రధాని మోదీ ఉన్నత స్థాయి సమీక్ష నిర్వహించారు. వైరస్​ వ్యాప్తి ఎక్కువగా ఉన్న రాష్ట్రాలకు కేంద్ర బృందాలను పంపాలని నిర్ణయించారు. ఏప్రిల్ 6 నుంచి 14 వరకు.. కరోనా జాగ్రత్తలు, మాస్క్​ వాడకంపై అవగాహన కార్యక్రమాలు నిర్వహించాలని సూచించారు.

దేశవ్యాప్తంగా కరోనా తీవ్రరూపం దాల్చుతున్న నేపథ్యంలో ప్రధాని మోదీ ఉన్నతస్థాయి సమీక్ష నిర్వహించారు. కొవిడ్ పరిస్థితులు, వ్యాక్సినేషన్​ ప్రక్రియపై అధికారులను వివరాలు అడిగి తెలుసుకున్నారు.

ఐదు విషయాల్లో నిక్కచ్చిగా ఉంటే కొవిడ్​ కట్టడి చేయడం సులభమవుతుందని మోదీ అన్నారు. పరీక్షల నిర్వహణ, ట్రేసింగ్, చికిత్స, కొవిడ్​ నిబంధనలు పాటించడం, వ్యాక్సినేషన్ ప్రక్రియ మొదలైనవి తప్పనిసరి అని పేర్కొన్నారు. మాస్కు ధరించడం, భౌతిక దూరం నిబంధనలను విస్మరించినందు వల్లే వైరస్​ ఉద్ధృతి పెరిగిందని అధికారిక ప్రకటనలో తెలిపారు. ముఖ్యంగా 10 రాష్ట్రాల్లో మహమ్మారి వ్యాప్తి అంతకంతకూ పెరుగుతోందని, దాదాపు 91 శాతం కేసులు ఆ రాష్ట్రాల్లోనివే అని స్పష్టం చేశారు.

కేంద్ర బృందాలు..

మహారాష్ట్రలో కొవిడ్ కేసుల సంఖ్య గణనీయంగా పెరుగుతోంది. పంజాబ్​, ఛత్తీస్​గఢ్​ రాష్ట్రాల్లోను కేసులు ఎక్కువగా నమోదవుతున్నాయి. ఈ నేపథ్యంలో కేంద్ర బృందాలు ఈ రాష్ట్రాల్లో పర్యటించాలని మోదీ ఆదేశించారు.

అవగాహన కార్యక్రమాలు...

ఏప్రిల్ 6 నుంచి 14 వరకు.. కరోనా జాగ్రత్తలు, మాస్క్​ వాడకంపై అవగాహన కార్యక్రమాలు నిర్వహించాలని సూచించారు మోదీ. దేశంలో ట్రయల్స్​లో ఉన్న​ వ్యాక్సిన్ల అభివృద్ధిపైనా దృష్టి సారించాలని నిర్దేశించారు.

ఇదీ చదవండి:సీడీ కేసులో ట్విస్ట్​- మాజీ మంత్రికి నోటీసులు