ఆస్ట్రేలియా ప్రధాన మంత్రి ఆంటోనీ ఆల్బనీస్తో దిల్లీలో శుక్రవారం భేటీ అయ్యారు భారత ప్రధాని నరేంద్ర మోదీ. ఇరుదేశాల సంబంధాల బలోపేతంపై ద్వైపాక్షిక చర్చలు జరిపారు. ఈ సందర్భంగా ఆస్ట్రేలియాలో ఉన్న హిందూ దేవాలయాలపై జరుగుతున్న దాడుల అంశాన్ని లేవనెత్తారు ప్రధాని మోదీ. గత కొన్ని రోజులుగా ఆస్ట్రేలియాలో ఉన్న హిందూ దేవాలయాలపై తరచూ దాడులు జరుగుతున్నాయని.. ఇలాంటి వార్తలు భారత్లోని ప్రతిఒక్కరినీ ఆందోళనకు గురిచేస్తున్నాయని ఆవేదన వ్యక్తం చేశారు. ఈ అంశాన్ని ఆస్ట్రేలియా ప్రధానికి తెలియచేయగా.. భారతీయుల రక్షణ తమ ప్రాధాన్యం అని ఆల్బనీస్ హామీ ఇచ్చారని మోదీ తెలిపారు. ఇరు దేశాలు రక్షణ రంగంలో అనేక ఒప్పందాలు చేసుకున్నామని.. సమగ్ర ఆర్థిక ఒప్పందంపై కృషి చేస్తున్నామని వెల్లడించారు. ఆస్ట్రేలియా-భారత్ సమగ్ర ఆర్థిక ఒప్పందాన్ని సాధ్యమైనంత త్వరగా పూర్తిచేస్తామని.. ఈ ఏడాది చివర వరకు పూర్తయ్యే అవకాశం ఉందని ఆశాభావం వ్యక్తం చేశారు. ఇండో-పసిఫిక్ సముద్ర భద్రత అంశంపైనా చర్చించినట్లు వివరించారు.
అంతకుముందు రాష్ట్రపతి భవన్లో ఆస్ట్రేలియా ప్రధానమంత్రి ఆంటోనీ ఆల్బనీస్కు ప్రధాని నరేంద్ర మోదీ ఘన స్వాగతం పలికారు. అక్కడ ఆల్బనీస్ సైనిక బలగాల గౌరవ వందనం స్వీకరించారు. ఉదయం రాజ్ఘాట్ వెళ్లిన ఆస్ట్రేలియా ప్రధాని.. మహాత్మా గాంధీ సమాధికి నివాళులు అర్పించారు. ఇదే సమయంలో ఆస్ట్రేలియా, భారత్ మంచి స్నేహితులని ఆస్ట్రేలియా ప్రధాని పేర్కొన్నారు. ఇరుదేశాల మధ్య రోజురోజుకు భాగస్వామ్యం మరింత బలపడుతోందని.. ఇలాగే కొనసాగుతుందని ఆశాభావం వ్యక్తం చేశారు. సంస్కృతి, ఆర్థిక సంబంధాలు, భద్రతా రంగంలో సహకారం కొనసాగిస్తామని స్పష్టం చేశారు. క్రికెట్ మైదానంలో ఇరుదేశాలు పోటీపడుతున్నాయి కానీ.. 2 దేశాలు కలిసి మెరుగైన ప్రపంచాన్ని నిర్మిస్తున్నాయని పేర్కొన్నారు. మోదీ, ఆల్బనీస్ ద్వైపాక్షిక చర్చల్లో వాణిజ్యం, పెట్టుబడులు, రక్షణ రంగాల్లో ఇరుదేశాల మధ్య సంబంధాలను పెంపొందించడం కోసం కృషి చేయనున్నట్లు తెలిపారు.