విజయన్ ప్రమాణానికి అడ్డంకులు-సుప్రీంలో పిటిషన్

కేరళ ముఖ్యమంత్రిగా రెండోసారి ప్రమాణస్వీకారం చేయనున్న పినరయ్ విజయన్​కు అవరోధాలు ఎదురవుతున్నాయి. రాష్ట్రంలో కొవిడ్ విజృంభణ కారణంగా.. కేవలం 75 మందితోనే ప్రమాణ స్వీకారం కార్యక్రమం జరపాలని సుప్రీం కోర్టులో పిటిషన్ దాఖలైంది.

కేరళ ముఖ్యమంత్రిగా వరుసగా రెండోసారి ప్రమాణస్వీకారం చేయనున్న పినరయ్ విజయన్​కు కొత్త చిక్కులువచ్చి పడ్డాయి. కొవిడ్ వ్యాప్తి దృష్ట్యా.. కేవలం 75 మందితోనే ప్రమాణ స్వీకార కార్యక్రమం నిర్వహించేలా కేరళ ప్రభుత్వాన్ని ఆదేశించాలని కోరుతూ కేఎం షాజహాన్​ అనే వ్యక్తి సుప్రీం కోర్టులో పిటిషన్ దాఖలు చేశారు.

తొలుత.. ప్రమాణస్వీకార వేదికను తిరువనంతపురంలోని సెంట్రల్ స్టేడియం నుంచి రాజ్ భవన్​కు మార్చాలని కేరళ హైకోర్టులో పిటిషన్ దాఖలైంది. ఆహ్వానితులను 50 మందికే పరిమితం చేసేలా ఆదేశించాలని పిటిషనర్​, డెమొక్రటిక్ పార్టీ రాష్ట్ర అధ్యక్షుడు జార్జి సెబాస్టియన్ కోరారు.

గవర్నర్​కు లేఖ..

ఓవైపు ప్రమాణస్వీకార కార్యక్రమంపై అడ్డంకులు వస్తుండగా.. సీపీఎం శాసనసభా పక్షనేతగా మంగళవారం ఎన్నికైన అనంతరం ముఖ్యమంత్రి విజయన్ రాజ్​భవన్​కు వెళ్లి గవర్నర్​ను కలిశారు. గవర్నర్​ అరిఫ్ మహమ్మద్ ఖాన్​ను కలిసి సంబంధిత లేఖను సమర్పించారు.

ఈ నెల 20న కొవిడ్ నిబంధనలతో 50 వేల సామర్థ్యం గల సెంట్రల్ స్టేడియంలో 500 మంది అతిథులతో ఈ కార్యక్రమాన్ని నిర్వహించ తలపెట్టారు.

ఇదీ చదవండి:'ఆర్మీ' పేపర్​ లీక్​: సికింద్రాబాద్ కల్నలే సూత్రధారి!