సీబీఐ దర్యాప్తుపై పరమ్​వీర్​ పిటిషన్​ ఉపసంహరణ

అనిల్​ దేశ్​ముఖ్​పై సీబీఐ విచారణ జరిపించాలన్న పిటిషన్​ను ఉపసంహరించుకున్నారు ముంబయి మాజీ సీపీ పరమ్​వీర్​ సింగ్. తొలుత హైకోర్టుకు వెళ్లాలన్న సుప్రీంకోర్టు సూచన మేరకు ఈ నిర్ణయం తీసుకున్నారు. బుధవారమే హై కోర్టులో పిటిషన్​ వేయనున్నారు.

మహారాష్ట్ర హోం మంత్రి అనిల్​ దేశ్​ముఖ్​పై సీబీఐ విచారణ జరిపించాలని సుప్రీంకోర్టులో దాఖలు చేసిన వ్యాజ్యాన్ని ముంబయి మాజీ పోలీస్ కమిషనర్ పరమ్ వీర్ సింగ్ ఉపసంహరించుకున్నారు. హైకోర్టుకు వెళ్లాలని సర్వోన్నత న్యాయస్థానం సూచించిన నేపథ్యంలో ఈ నిర్ణయం తీసుకున్నారు.

ఈ కేసులో తొలుత హైకోర్టుకు వెళ్లకుండా సుప్రీం కోర్టుకు ఎందుకు వచ్చారని జస్టిస్ సంజయ్ కిషన్ కౌల్ నేతృత్వంలోని ధర్మాసనం పిటిషనర్​ను ప్రశ్నించింది. ఇది చాలా తీవ్రమైన అంశమే అయినప్పటికీ.. తొలుత హైకోర్టును సంప్రదించాల్సిందేనని పేర్కొంది. అత్యున్నత న్యాయస్థానం సూచన మేరకు బుధవారమే హైకోర్టులో వ్యాజ్యం దాఖలు చేయనున్నట్లు పరమ్ వీర్ సింగ్ తరఫు న్యాయవాది ముకుల్ రోహత్గి తెలిపారు.

పరమ్​ వీర్ సింగ్ పిటిషన్ ఇదీ..

హోంమంత్రి అనిల్ దేశ్ ముఖ్ ప్రతినెలా 100 కోట్లు వసూళ్లను వాజేకు లక్ష్యంగా పెట్టారని సీఎంకు లేఖ రాశారు పరమ్ వీర్ సింగ్. ఈ ఆరోపణల నిగ్గు తేల్చేందుకు సీబీఐతో విచారణ జరిపించాలని కోర్టులో పిటిషన్ వేశారు. ఇందులో తన బదిలీని కూడా సవాలు చేశారు.

ఇదీ చదవండి:'మహా'లో లేఖ రచ్చ- ఠాక్రే సర్కార్​పై ఒత్తిడి!