కొవిడ్‌ మహమ్మారి విజృంభిస్తోన్న వేళ.. కర్తార్‌పుర్‌లో ఉన్న సిక్కుల పవిత్ర క్షేత్రం సందర్శనకు భారత యాత్రికులను అనుమతి ఇస్తామని పాకిస్థాన్‌ వెల్లడించింది. అయితే, రెండు డోసుల్లో వ్యాక్సిన్‌ తీసుకున్న వారికి మాత్రమే అనుమతి ఉంటుందని స్పష్టం చేసింది. సిక్కుల మత వ్యవస్థాపకులు, గురువు గురునానక్‌ 482వ వర్థంతి (సెప్టెంబర్‌ 22) సందర్భంగా వచ్చే నెల నుంచి యాత్రికులను అనుమతిస్తామని తెలిపింది. ఇరు దేశాల్లో కొవిడ్‌ ప్రభావం కారణంగా గతేడాది (2020) మార్చి నుంచి కర్తార్‌పుర్‌కు భారత యాత్రికులను పాకిస్థాన్‌ అనుమతించడం లేదు.
కొవిడ్‌ మూడో వేవ్‌ ప్రభావానికి వణికిపోతోన్న పాకిస్థాన్‌, విదేశాల నుంచి వచ్చే వారిపై ఆంక్షలు విధిస్తోంది. ముఖ్యంగా డెల్టా వేరియంట్‌ ప్రభావం ఎక్కువగా ఉండడంతో భారత్‌ను పాకిస్థాన్‌ కేటగిరీ-సీ లో ఉంచింది. దీంతో అక్కడికి వెళ్లే వారితోపాటు యాత్రికులకు ప్రత్యేక అనుమతి అవసరం. తాజాగా కర్తార్పుర్ గురుద్వారా యాత్రికుల విషయంలో మల్లగుల్లాలు పడిన పాక్.. చివరకు వ్యాక్సిన్‌ తీసుకున్న వారిని అనుమతిస్తామని ప్రకటించింది. అంతేకాకుండా 72గంటలలోపు ఉన్న ఆర్‌టీపీసీఆర్‌ టెస్టు రిపోర్టును కూడా తీసుకురావాలని సూచించింది.