కర్తార్పుర్ నడవా నిర్వహణ వ్యవస్థను ఇష్టానుసారంగా మార్చివేసిన పాకిస్థాన్పై తీవ్రస్థాయిలో మండిపడింది భారత్. ఈ విధంగా ప్రవర్తించి.. ఐరాస సాధారణ సభ(యూఎన్జీసీ) తీర్మానాన్ని పాకిస్థాన్ ఉల్లంఘించిందని ఆగ్రహం వ్యక్తం చేసింది.
'కల్చర్ ఆఫ్ పీస్'పై యూఎన్జీసీలో ప్రసంగించారు ఐరాసలో భారత శాశ్వత మిషన్ మొదటి కార్యదర్శి ఆశిష్ శర్మ. సిక్కు మతం, దాని రక్షణకు పాక్ చర్యలు భంగం కలిగిస్తున్నాయని తేల్చిచెప్పారు.
కర్తార్పుర్ సాహెబ్ నడవా నిర్వహణను.. సిక్కు గురుద్వారా పర్బంధక్ కమిటీ నుంచి ఈటీపీబీ(ఇవాక్యు ట్రస్ట్ ప్రాపర్టీ బోర్డు) యంత్రాంగానికి గత నెలలో బదిలీ చేసింది ఇమ్రాన్ఖాన్ ప్రభుత్వం. అది సిక్కుయేతర బోర్డు కావడం గమనార్హం.
నవంబర్లోనే పాక్ నిర్ణయాన్ని ఖండించింది భారత్. పాకిస్థాన్ ఏకపక్ష నిర్ణయాలు తీసుకుని కర్తార్పుర్ నడవా విలువలు, సిక్కుల విశ్వాసానికి వ్యతిరేకంగా ప్రవర్తిస్తోందని మండిపడింది.
ఇదీ చూడండి:-'ఇలా అయితే మేం పాకిస్థాన్ నుంచి వెళ్లిపోతాం!'
యూఎన్జీసీ విఫలం...
బౌద్ధ, హిందు, సిక్కు మతాలపై జరుగుతున్న దాడులను గుర్తించడంలో యూఎన్జీసీ విఫలమైందని అసహనం వ్యక్తం చేసింది భారత్. కొన్ని మతాలనే ఎంచుకుని వాటిపైనే స్పందిస్తోందని... ఈ వ్యవహారంశైలి సరైనది కాదని తేల్చిచెప్పారు ఆశిష్. కేవలం 'అబ్రహామిక్' మతాలకే శాంతి ఉండాలనుకోవడం మంచి విషయం కాదని.. అన్ని మతాలవారూ ప్రశాంతంగా జీవించాలని పేర్కొన్నారు.
యాంటీ సెమిటిసమ్, ఇస్లామోఫోబియా, యాంటీ క్రిస్టియన్ కార్యకలాపాలను ఐరాస ఖండించడాన్ని భారత్ సమర్థిస్తోందని.. కానీ అది కేవలం ఈ మతాలకే పరిమితం కాకూడదని తెలిపారు ఆశిష్.
మరోవైపు పాకిస్థాన్పైనా విరుచుకుపడ్డారు ఆశిష్ శర్మ. భారత్లోని మతాలపై ద్వేషాన్ని మానుకుని, సీమాంతర ఉగ్రవాదానికి కళ్లెం వేయాలని హితవు పలికారు. అప్పుడే శాంతిని పాటించాలని ఐరాస కోరుకుంటున్న సంస్కృతి.. దక్షిణాసియా సహా ఇతర ప్రాంతాల్లో అమలు చేసేందుకు వీలు అవుతుందన్నారు. లేకపోతే పాకిస్థాన్ దుశ్చర్యలను అందరు మౌనంగా వీక్షించక తప్పదని తెలిపారు.
ఇదీ చూడండి:-'ఎన్నికలు కాదు.. పాకిస్థాన్తో చర్చలు జరపండి'
