19:46 April 21
24కు చేరిన మృతుల సంఖ్య
నాసిక్ ఆసుపత్రిలో ఆక్సిజన్ ట్యాంకు లీకేజీ ఘటనలో మృతుల సంఖ్య 24కు చేరింది. మధ్యాహ్నం 22 మంది ప్రాణాలు కోల్పోగా మరో ఇద్దరు మరణించినట్లు నాసిక్ మేయర్ సతీశ్ కులకర్ణి తెలిపారు. ఆసుపత్రి యాజమాన్యం నిర్లక్ష్యం లేదని తెలిపారు. ఉన్నతస్థాయి దర్యాప్తు కమిటీ వేసినట్లు చెప్పారు.
16:14 April 21
ప్రధాని సంతాపం
నాసిక్ ఆసుపత్రిలో ఆక్సిజన్ ట్యాంక్ లీకేజీతో 22 మంది మృతి చెందటంపై దిగ్భ్రాంతి వ్యక్తం చేశారు ప్రధానమంత్రి నరేంద్ర మోదీ. నాసిక్ ఆసుపత్రి ఘటన హృదయాన్ని కలచివేసిందన్నారు. మృతుల కుటుంబాలకు ప్రగాఢ సానుభూతి తెలిపారు.
రూ.5 లక్షల పరిహారం..
నాసిక్ ఆసుపత్రి ఘటన మృతుల కుటుంబాలకు రూ.5 లక్షల చొప్పున పరిహారం ప్రకటించింది మహారాష్ట్ర ప్రభుత్వం. ఘటనపై ఉన్నత స్థాయి కమిటీ ఏర్పాటు చేసినట్లు మహారాష్ట్ర సీఎంఓ వెల్లడించింది.
15:30 April 21
నాసిక్ ఘటనపై ప్రముఖుల సంతాపం
నాసిక్ ఆస్పత్రి ఘటనలో మరణించిన వారికి కేంద్ర హోంమంత్రి అమిత్‌ షా సంతాపం తెలిపారు. ఆక్సిజన్ అందక 22 మంది మరణించడం బాధాకరమని, మృతుల కుటుంబాలకు ప్రగాఢ సానుభూతి ప్రకటించారు.
నాసిక్ ఆస్పత్రి ఘటన కలచివేసిందని తెలిపారు మహారాష్ట్ర మాజీ ముఖ్యమంత్రి దేవేంద్ర ఫడణవీస్. ఆక్సిజన్ అందక 22మంది మరణించడం దురదృష్టకరమన్నారు. ఘటనపై పూర్తిస్థాయి దర్యాప్తు చేయాలని డిమాండ్ చేశారు.
14:33 April 21
నాసిక్ ఘటనలో 24కు చేరిన మృతుల సంఖ్య
మహారాష్ట్ర నాసిక్లోని డాక్టర్ జాకీర్ హుస్సేన్ ఆసుపత్రిలో ఘోర ప్రమాదం జరిగింది. ఆక్సిజన్ ట్యాంక్ లీకేజీ కారణంగా 22 మంది రోగులు చనిపోయారు. వారంతా వెంటిలేషన్పై చికిత్స తీసుకుంటున్నట్లు ఆ రాష్ట్ర ఆరోగ్య శాఖ మంత్రి రాజేశ్ తోపే తెలిపారు. ఆక్సిజన్ స్టోరేజీ ట్యాంక్ లీకేజీ ఘటనపై దర్యాప్తు చేపడతామని హామీ ఇచ్చారు.
" మాకు అందిన సమాచారం ప్రకారం నాసిక్లోని ఆసుపత్రిలో వెంటిలేటర్పై చికిత్స పొందుతున్న 22 మంది రోగులు ప్రాణాలు కోల్పోయారు. ఈ రోగులకు ఆక్సిజన్ సరఫరా చేసే ట్యాంకు లీకేజీకి గురైనట్లు గుర్తించాం. వారి మృతికి ఆక్సిజన్ ట్యాంక్ లీకేజీనే కారణంగా భావిస్తున్నాం. మహారాష్ట్ర ప్రభుత్వం ఈ అంశాన్ని పరిశీలిస్తోంది. దర్యాప్తు చేపడతాం. దర్యాప్తు పూర్తయిన తర్వాత ప్రకటన విడుదల చేస్తాం. "
- రాజేశ్ తోపే, మహారాష్ట్ర ఆరోగ్య మంత్రి.
ఆక్సిజన్ ట్యాంక్ లీకేజీతో వెంటిలేటర్పై ఉన్న రోగులకు ప్రాణవాయువు సరఫరాలో అంతరాయంతోనే 22 మంది మృతి చెందినట్లు వెల్లడించారు నాసిక్ కలెక్టర్ సూరజ్ మంధేర్. లీకేజీ అయిన వెంటనే ఇతర ప్రాంతాల నుంచి ఆక్సిజన్ సిలిండర్లను ఆసుపత్రికి తరలించినట్లు చెప్పారు.
బుధవారం ఉదయం జరిగిన ఆక్సిజన్ ట్యాంక్ లీకేజీ వీడియో సామాజిక మాధ్యమాల్లో వైరల్గా మారింది. తమ బంధువుల మృతికి ఆక్సిజన్ సరఫరాలో అంతరాయమే కారణమని వారి కుటుంబ సభ్యులు ఆందోళన వ్యక్తం చేశారు.
