Rajya Sabha: 12 మంది రాజ్యసభ సభ్యులపై సస్పెన్షన్ విషయంలో తన నిర్ణయాన్ని సమర్థించుకున్నారు ఛైర్మన్ వెంకయ్యనాయుడు. సభ్యులు గత సమావేశాల్లో సభలో విధ్వంసం సృష్టించారని గుర్తు చేశారు. అలాంటి వారిని సస్పెండ్ చేయడం న్యాయమే అన్నారు.
parliament winter session: సభ్యుల సస్పెన్షన్ నిర్ణయాన్ని వెనక్కి తీసుకోవాలని రాజ్యసభలో ప్రతిపక్షనేత మల్లికార్జున్ ఖర్గే వెంకయ్యను విజ్ఞప్తి చేశారు. ఈ విషయంపై మాట్లాడేందుకు ఆయన కార్యాలయానికి వెళ్లామన్నారు. గత సెషన్లో జరిగిన దానికి ఇప్పుడు వేటు వేయడం తగదన్నారు. వెంకయ్య నాయుడు మాత్రం నిర్ణయాన్ని ఉపసంహరించుకునే ప్రసక్తే లేదని తేల్చి చెప్పారు. సభ ఛైర్మన్గా సభ్యులను సస్పెండ్ చేసే అధికారం తనకు ఉందన్నారు. దీంతో కాంగ్రెస్ సహా విపక్ష సభ్యులు సభ నుంచి వాకౌట్ చేశారు.
సభ్యులపై సస్పెన్షన్ను నిరసిస్తూ అంతకుముందు లోక్సభలో కూడా విపక్షాలు ఆందోళనకు దిగాయి. వారికి మద్దతుగా సభ నుంచి వాకౌట్ చేశాయి. వీరి ఆందోళనల నడుమ సభను మధ్యాహ్నం 2 గంటల వరకు వాయిదా వేశారు స్పీకర్ ఓం బిర్లా.
ఉభయ సభల నుంచి వాకౌట్ చేసిన ప్రతిపక్ష నేతలు పార్లమెంటు ఆవరణలోని గాంధీ విగ్రహం వద్ద నిరసనకు దిగారు. 12 మందిపై సస్పెన్షన్ను ఎత్తివేయాలని డిమాండ్ చేశారు
కాలుజారి కింద పడ్డ ఎంపీ..
వాకౌట్ చేసే క్రమంలో పార్లమెంటు కారిడార్ నుంచి బయటకు వస్తూ కాంగ్రెస్ లోక్సభ ఎంపీ కే సురేశ్ కాలుజారి పడ్డారు. వెంటనే ఆయనకు ప్రాథమిక చికిత్స అందించారు. అనంతరం ఆస్పత్రికి తరలించారు.
పార్లమెంటు సమావేశాల బహిష్కరణ!
రెండో రోజు సమావేశాల ప్రారంభానికి ముందు పార్లమెంటు ఆవరణలో ప్రతిపక్షాలు సమావేశమయ్యాయి. 12మంది సభ్యుల సస్పెన్షన్ అంశంపై చర్చించాయి. ఒకవేళ ఛైర్మన్ ఈ సభ్యులపై సస్పెన్షన్ నిర్ణయాన్ని వెనక్కి తీసుకోకపోతే మొత్తం సమావేశాలను బహిష్కరించాలని నిర్ణయించాయి. ఈ భేటీలో కాంగ్రెస్ అగ్రనేత రాహుల్ గాంధీ కూడా పాల్గొన్నారు. టీఎంసీ మినహా 16 పార్టీలు సమావేశంలో పాల్గొన్నాయి. డీఎంకే, శివసేన, ఎన్సీపీ, సీపీఎం, సీపీఐ, ఆప్, ఆర్జేడీ, ఐయూఎంఎల్, ఎండీఎంకే, ఎల్జేడీ, ఎన్సీ, ఆర్ఎస్పీ, టీఆర్ఎస్, కేరళ కాంగ్రెస్, వీసీకే పార్టీలకు చెందిన సభ్యులు హాజరయ్యారు. సస్పెన్షన్కు గురైన వారిలో తమ పార్టీకి చెందిన ఇద్దరు సభ్యులు ఉన్నప్పటికీ టీఎంసీ విపక్షాల సమావేశానికి హాజరు కాలేదు. పార్లమెంటు శీతాకాల సమావేశాల తొలిరోజు కూడా విపక్షాలు నిర్వహించిన సమావేశానికి టీఎంసీ నేతలు దూరంగా ఉండటం గమనార్హం.
ఇదీ చదవండి: ఆటోవాలా కూతురుకు ఆరు గోల్డ్ మెడల్స్
