అక్రమాస్తుల కేసులో మాజీ సీఎంకు షాక్- నాలుగేళ్లు జైలు, రూ.50లక్షలు ఫైన్

OP Chautala Case: అక్రమాస్తుల కేసులో హరియాణా మాజీ ముఖ్యమంత్రి ఓపీ చౌతాలాకు శిక్ష ఖరారు చేసింది దిల్లీలోని సీబీఐ ప్రత్యేక కోర్టు. నాలుగేళ్లు జైలుశిక్ష, రూ.50లక్షలు జరిమానా విధించింది. చౌతాలాకు చెందిన నాలుగు ఆస్తులను జప్తు చేయాలని ఆదేశించింది.

OP Chautala Case: అక్రమాస్తుల కేసులో హరియాణా మాజీ ముఖ్యమంత్రి ఓం ప్రకాశ్​ చౌతాలాకు శిక్ష ఖరారు చేసింది దిల్లీలోని సీబీఐ ప్రత్యేక కోర్టు. నాలుగేళ్లు జైలుశిక్ష, రూ.50లక్షలు జరిమానా విధించింది. చౌతాలాకు చెందిన నాలుగు ఆస్తులను జప్తు చేయాలని ఆదేశించింది. గతవారం చౌతాలాను దోషిగా నిర్ధరించారు స్పెషల్​ జడ్జి వికాస్​ ధుల్​.

కేంద్ర దర్యాప్తు సంస్థ (సీబీఐ) నమోదు చేసిన ఎఫ్​ఐఆర్​ ప్రకారం.. 1999, జులై 24- 2005, మార్చి 5 మధ్య హరియాణా సీఎంగా చౌతాలా పనిచేసిన సమయంలో అక్రమంగా ఆస్తులు కూడబెట్టారు. చౌతాలా, ఆయన కుటుంబసభ్యుల పేరుమీద మొత్తం రూ.1467 కోట్ల మేర ఆస్తులున్నట్లు గుర్తించింది సీబీఐ. మొత్తంగా చౌతాలాకు రూ.6.9 కోట్ల అక్రమ ఆస్తులు ఉన్నట్లు లెక్కించింది.

ఈ మొత్తాన్ని దేశవిదేశాల్లో వివిధ రూపాల్లో పెట్టుబడులు పెట్టినట్లు సీబీఐ అభియోగాలు మోపింది. నగదు, నగలు కాకుండా.. 43 స్థిరాస్తులు పోగుచేసినట్లు సీబీఐ పేర్కొంది. ఎఫ్​ఐఆర్​లో పొందుపర్చినవే కాకుండా.. చౌతాలా కుటుంబానికి చెందిన చాలా ఆస్తులు అక్రమంగా సంపాదించినవి ఉన్నట్లు వెల్లడించింది. 2005లో చౌతాలాపై సీబీఐ కేసు నమోదు చేసింది. 2010, మార్చి 26న ఛార్జి షీట్​ దాఖలు చేసింది.

2013లో:ఉపాధ్యాయ నియామకం కుంభకోణం కేసుకు సంబంధించి 2013లో చౌతాలా జైలు పాలయ్యారు. 2020 మార్చి 26న ఆయనకు ఎమర్జెన్సీ పెరోల్​ లభించింది. 2021 ఫిబ్రవరి 21న మళ్లీ జైలుకు రావాల్సిందిగా ఆదేశాలిచ్చారు అధికారులు. తర్వాత ఆయనకు పెరోల్​ గడువు పొడిగిస్తూ హైకోర్టు ఆదేశాలిచ్చింది. ఓపీ చౌతాలా, ఆయన కుమారుడు అజయ్ చౌతాలా, మరో 53 మంది ఈ కేసుకు సంబంధించి శిక్ష అనుభవించారు. ఇందులో ఐఏఎస్ అధికారి సంజీవ్​ కుమార్​ కూడా ఉన్నారు. 2000 సంవత్సరంలో 3,206 మందిని అక్రమంగా ఉపాధ్యాయులుగా నియమించడంలో వీరు కీలక పాత్ర పోషించారు.

ఇవీ చూడండి:86ఏళ్ల వయసులో 10వ తరగతి పాసైన మాజీ సీఎం..