One Nation One Election Committee : జమిలి ఎన్నికలపై కేంద్రం కమిటీ.. సభ్యులు వీరే

One Nation One Election Committee Members : 'ఒకే దేశం- ఒకే ఎన్నికలు' నిర్వహణ సాధ్యాసాధ్యాలను పరిశీలించేందుకు 8 మందితో కమిటీ ఏర్పాటు చేసింది. మాజీ రాష్ట్రపతి రామ్​నాథ్​ కోవింద్ నేతృత్వంలోని కమిటీలో.. అధికార, ప్రతిపక్ష నేతలతో పాటు..శాసన, న్యాయ, ఆర్థిక నిపుణులకు చోటు కల్పించింది. వారెవరంటే?

One Nation One Election Committee Members :'ఒకే దేశం- ఒకే ఎన్నికలు' సాధ్యాసాధ్యాల పరిశీలనకు.. మాజీ రాష్ట్రపతి రామ్​నాథ్ కోవింద్ నేతృత్వంలో కమిటీని ఏర్పాటు చేసిన కేంద్రం.. మొత్తం 8 మంది సభ్యులను నియమించింది. అధికార, ప్రతిపక్ష నేతలతో పాటు.. శాసన, న్యాయ, ఆర్థిక నిపుణులకు చోటు కల్పించింది. సార్వత్రిక ఎన్నికలు.. ముందే జరుగుతాయనే ఊహాగానాలు మధ్య కేంద్రం చర్యలు మరింత ఆసక్తి కనబరుస్తున్నాయి.

ఈ కమిటీకి ఛైర్మన్‌గా మాజీ రాష్ట్రపతి రామ్‌నాథ్ కోవింద్ నియమితులయ్యారు. కమిటీలో కేంద్ర హోంమంత్రి అమిత్ షా, కాంగ్రెస్ ఎంపీ అధీర్ రంజన్ చౌదురి, రాజ్యసభ మాజీ ప్రతిపక్ష నేత గులాం నబీ ఆజాద్, 15వ ఆర్థిక సంఘం మాజీ ఛైర్మన్ ఎన్​కే సింగ్, లోక్​సభ మాజీ సెక్రటరీ జనరల్ డాక్టర్ సుభాశ్ సీ కశ్యప్, సీనియర్ అడ్వొకేట్ హరీశ్ సాల్వే, మాజీ చీఫ్​ విజిలెన్స్ కమిషనర్ సంజయ్ కొఠారి ఉన్నారు.

తిరస్కరించిన అధీర్​ రంజన్​..
అయితే ఈ కమిటీలో సభ్యుడిగా తనకు అందిన ఆహ్వానాన్ని కాంగ్రెస్ ఎంపీ అధీర్ రంజన్ చౌదురి తిరస్కరించారు. దీనిపై తనకు ఏలాంటి సంకోచం లేదని తేల్చి చెప్పారు. ఈ మేరకు ఆయన రాసిన లేఖలో పేర్కొన్నారు.

Simultaneous Elections :ఈ కమిటీ వెంటనే పని ప్రారంభించి వీలైనంత త్వరగా సిఫార్సులు చేయనుంది. ఈ కమిటీ సమావేశాలకు న్యాయశాఖ మంత్రి అర్జున్​ రామ్ మేఘ్​వాల్​ ప్రత్యేక ఆహ్వానితుడిగా హాజరుకానున్నారు. ఇక న్యాయశాఖ కార్యదర్శి నితేన్ చంద్ర.. ఈ కమిటీకి సెక్రటరీగా వ్యవహరిస్తారు. ఈ జమిలి ఎన్నికలు నిర్వహించడానికి.. ప్రజాప్రతినిధుల చట్టంతో పాటు ఇంకా ఏఏ చట్టాలు, నిబంధనలను సవరించాలో అనే అంశాలను పరిశీలించి సిఫారసు చేస్తుంది. దీంతో పాటు ఈ సవరణలకు రాష్ట్రాల ఆమోదం అవసరమో లేదో అన్న విషయం కూడా తేల్చనుంది. ఇక, హంగ్​ ఏర్పడినప్పుడు, అవిశ్వాస తీర్మానం, ఫిరాయింపులు వంటి పరిస్థితులు ఏర్పడినప్పుడు అవసరమయ్యే పరిష్కారాలను కూడా కమిటీ విశ్లేషించి సిఫారసు చేయనుంది.

Law Commission Of India Report On Electoral Reforms :లా కమిషన్‌ 170వ నివేదిక, 2015 డిసెంబరులో ప్రజా వినతులు, న్యాయ విభాగపు.. పార్లమెంటరీ స్టాండింగ్ కమిటీ 79వ నివేదిక ఒకే దేశం, ఒకే ఎన్నికను సిఫారసు చేశాయని కేంద్ర న్యాయశాఖ తన ఆదేశాల్లో తెలిపింది. ఈ సిఫారసుల మేరకు లోక్‌సభ, రాష్ట్రాల అసెంబ్లీలు, మున్సిపాలిటీలు, పంచాయతీలకు ఒకేసారి ఎన్నికలు నిర్వహించే అంశంపై.. ప్రస్తుతం ఉన్న రాజ్యాంగ నిబంధనలు మేరకు అధ్యయనం చేయాలని పేర్కొంది.