'రైతుల ఆదాయం రెట్టింపునకు కృషి'

పీఎం-కిసాన్​ ద్వితీయ వార్షికోత్సవం సందర్భంగా.. రైతుల ఆదాయాన్ని రెట్టింపు చేసేందుకు ప్రభుత్వం అన్నివిధాలుగా ప్రయత్నిస్తోందని ప్రధాన మంత్రి నరేంద్ర మోదీ చెప్పారు. దేశ ప్రజలకు అన్నం పెట్టే రైతన్నలు ఎందరికో స్ఫూర్తిదాయకమని కొనియాడారు.

దేశంలో రైతుల ఆదాయాన్ని పెంచేందుకు తీసుకొచ్చిన ప్రధాన మంత్రి కిసాన్​ సమ్మాన్​ నిధి(పీఎం-కిసాన్​) రెండో వార్షికోత్సవం సందర్భంగా ట్వీట్ చేశారు ప్రధాన మంత్రి నరేంద్ర మోదీ. అన్నదాతల ఆదాయాన్ని రెట్టింపు చేసేందుకు కేంద్రం అన్నివిధాలుగా ప్రయత్నిస్తోందని అన్నారు. పంటల సేకరణ కోసం కనీస మద్దతు ధర(ఎంఎస్పీ)లో చరిత్రాత్మక పెరుగుదలను సాధించిన ఘనత తమ ప్రభుత్వానికే దక్కుతుందని చెప్పారు.

"గత ఏడేళ్లలో వ్యసాయ విధానంలో మార్పు కోసం ప్రభుత్వం అనేక కార్యక్రమాలు చేపట్టింది. ఆధునిక సాంకేతిక పరిజ్ఞానంతో మెరుగైన నీటి పారుదల ప్రాజెక్టులు మొదలుకొని.. రైతు రుణాలు పెంచడం, పంటకు సరైన బీమా కల్పించడం, నేలపై దృష్టి సారించడం, మధ్యవర్తులను తొలగించడం వంటి ఎన్నో ప్రయత్నాలు ఇందులో ఉన్నాయి."

- నరేంద్ర మోదీ, ప్రధాన మంత్రి

ప్రధాని నరేంద్ర మోదీ ట్వీట్

అన్నదాతల శ్రేయస్సుకోసం రెండేళ్ల క్రితం ఇదే రోజు(ఫిబ్రవరి 24)న పీఎం-కిసాన్​ పథకం ప్రారంభించామన్నారు మోదీ. దేశ ప్రజలకు అన్నం పెట్టేందుకు రైతులు రేయింబవళ్లు కష్టపడి పనిచేస్తున్నారన్న ఆయన.. వారి చిత్తశుద్ధి ఎందరికో స్ఫూర్తిదాయకమని కొనియాడారు.

ఏంటీ 'పీఎం-కిసాన్' యోజన?

దేశంలో చిన్న, సన్నకారు రైతుల ఆదాయాన్ని పెంచడం కోసం.. 2019 ఫిబ్రవరి 24న పీఎం-కిసాన్​ యోజనను ప్రారంభించారు మోదీ. రెండు హెక్టార్లు లేదా అంతకన్నా తక్కువ భూమి కలిగి ఉండి.. దేశీయ పౌరులైన రైతులకు ఈ పథకం కింద ఆర్థిక సాయం అందిస్తుంది ప్రభుత్వం.

ఇదీ చదవండి:కశ్మీర్​లో పాకిస్థానీ మహిళల నిరసన.. ఎందుకంటే?