మహారాష్ట్రలో ఒక్కరోజే 7 ఒమిక్రాన్​ కేసులు

Omicron cases in India: మహారాష్ట్రలో ఒమిక్రాన్​ వేరియంట్​ కేసులు భారీగా వెలుగు చూస్తున్నాయి. శుక్రవారం ఒక్కరోజే ఏడుగురికి ఒమిక్రాన్​ నిర్ధరణ అయింది. దీంతో దేశవ్యాప్తంగా మొత్తం కేసుల సంఖ్య 32కు చేరింది.

Omicron cases in India: ప్రపంచాన్ని వణికిస్తున్న కరోనా కొత్త వేరియంట్ 'ఒమిక్రాన్​'​.. భారత్​లో క్రమంగా విజృంభిస్తోంది. ముఖ్యంగా మహారాష్ట్రలో ఈ కొత్త రకం కేసులు భారీగా వెలుగు చూస్తున్నాయి. శుక్రవారం ఒక్కరోజే ఏడుగురికి ఒమిక్రాన్​ సోకినట్లు నిర్ధరణ అయింది. ఏడు కేసుల్లో ముంబయిలో 3, పింప్రి చించ్వాడా మున్సిపల్​ కార్పొరేషన్​ పరిధిలో 4 కేసులు ఒక్కరోజే వెలుగు చూశాయి.

ముంబయిలోని ధారావిలో టాంజానియా నుంచి వచ్చిన వ్యక్తికి కొత్త వేరియంట్​ సోకినట్లు నిర్ధరణ అయింది. బాధితుడిని సెవన్​ హిల్స్​ ఆసుపత్రికి తరలించినట్లు బృహన్​ ముంబాయి మున్సిపల్​ కార్పొరేషన్​ అధికారులు తెలిపారు.

తాజా కేసులతో రాష్ట్రంలో మొత్తం కేసుల సంఖ్య 17కు చేరినట్లు మహారాష్ట్ర ఆరోగ్య శాఖ వెల్లడించింది.

ఐదుగురికి నెగెటివ్​..

పుణెలో ఒమిక్రాన్ సోకిన ఏడుగురిలో ఐదుగురు కోలుకున్నట్లు డిప్యూటీ సీఎం అజిత్ పవార్ ప్రకటించారు. జిల్లాలోని పింప్రి చించ్వాడా ప్రాంతంలో ఉన్న ఆరుగురిలో నలుగురు, పుణె నగరంలో ఓ వ్యక్తికి నెగటివ్​గా తేలింది. 'మొత్తంగా ఏడుగురి ఆరోగ్యం ప్రస్తుతం బాగానే ఉంది' అని పవార్ తెలిపారు.

దేశంలో 32కు ఒమిక్రాన్​ కేసులు

మహారాష్ట్రలో ఇప్పటికే 10 ఒమిక్రాన్​ కేసులు ఉండగా శుక్రవారం ఒక్కరోజే ఏడుగురికి కొత్త వేరియంట్​ సోకింది. దీంతో దేశవ్యాప్తంగా మొత్తం 32 కేసులు నిర్ధరణ అయ్యాయి.

• మహారాష్ట్ర- 17
• రాజస్థాన్​- 9
• గుజరాత్​- 3
• కర్ణాటక- 2
• దిల్లీ- 1

ఇదీ చూడండి:కరోనా సెకండ్​ వేవ్​లో వైద్యం కోసం లంచం ఇచ్చిన 40% ప్రజలు!