బ్రిటిష్‌ పాలకులు 1927లో ప్రారంభించిన పార్లమెంటు భవనం ఇక చరిత్ర పుటలకు పరిమితం కానుందా? సోమవారంతో ముగిసిన వర్షాకాల సమావేశాలే ఈ పార్లమెంటుకు చివరి సమావేశాలా? రోజురోజుకు ఈ ప్రశ్నలు ప్రాముఖ్యం సంతరించుకుంటున్నాయి. 101 సంవత్సరాల క్రితం శంకుస్థాపన జరిగిన ప్రస్తుత పార్లమెంటు భవనం ఆరు ఎకరాల్లో విస్తరించింది. మొదటి అంతస్తులో 144 స్తంభాలతో ఠీవిగా దర్శనమిస్తుంది. దీని పక్కనే 2020 డిసెంబరులో ప్రధానమంత్రి నరేంద్ర మోదీ శంకుస్థాపన చేసిన కొత్త పార్లమెంటు భవన నిర్మాణం ఈ ఏడాది ఆగస్టు 15వ తేదీకల్లా పూర్తవుతుందని ఆశించారు. అయితే శీతాకాల సమావేశాలకు గానీ కొత్త భవనం సిద్ధమయ్యేలా లేదు. అందులో సమావేశాలు ప్రారంభమైన రోజు బ్రిటిషర్లు నిర్మించిన పాత పార్లమెంటు భవనం చరిత్ర చిహ్నంలా మిగులుతుంది.
1920ల్లో బ్రిటిషర్లు రాజధానిని కలకత్తా నుంచి దిల్లీకి మార్చిన తరువాత 1921 ఫిబవరి 12న బ్రిటిష్‌ డ్యూక్‌ ఆఫ్‌ కనాట్‌ పార్లమెంటు భవన నిర్మాణానికి శంకుస్థాపన చేశారు. అప్పట్లో దాన్ని కౌన్సిల్‌ హౌస్‌గా పరిగణించారు. ఆ తరువాత 26 ఏళ్లకే దేశానికి స్వాతంత్య్రం వచ్చింది. కౌన్సిల్‌ హౌస్‌ పక్కనే నిర్మితమైన వైస్రాయ్‌ హౌస్‌ స్వాతంత్య్రం వచ్చాక రాష్ట్రపతి భవన్‌గా మారింది. పార్లమెంటు భవనానికి శంకుస్థాపన జరిగి గత సంవత్సరం ఫిబ్రవరికి నూరేళ్లు పూర్తయ్యాయి. ఆ సమయంలో పార్లమెంటులో బడ్జెట్‌ సమావేశాలు జరుగుతుండగా, దాని పక్కనే కొత్త పార్లమెంటు భవన నిర్మాణ పనులు సాగుతూ ఉన్నాయి.