Police kills colleagues: దిల్లీలో విధులు నిర్వర్తిస్తున్న ఓ పోలీసు.. సహోద్యోగులపై కాల్పులకు తెగబడ్డాడు. తన భార్య గురించి అనుచితంగా మాట్లాడారన్న ఆరోపణతో తుపాకీతో కాల్చి చంపాడు. ఘటన జరిగిన తర్వాత నిందితుడు ప్రబీణ్ రాయ్(32) పోలీసుల ఎదుట లొంగిపోయాడు. చనిపోయిన ముగ్గురు సిక్కిం పోలీసు విభాగానికి చెందినవారని అధికారులు తెలిపారు. ఇండియన్ రిజర్వు బెటాలియన్లో భాగమైన వీరిని.. దిల్లీలోని ఓ ప్లాంటు వద్ద భద్రత కోసం మోహరించినట్లు చెప్పారు.
'మధ్యాహ్నం 3 గంటల సమయంలో కేఎన్కే మార్గ్ పోలీస్ స్టేషన్కు ఘటన గురించి సమాచారం అందింది. కాల్పులకు గురైన పోలీసులలో ఇద్దరు ఘటనాస్థలిలోనే చనిపోయారు. తీవ్రంగా గాయపడ్డ మరొకరిని బీఎస్ఏ ఆస్పత్రికి తీసుకెళ్లాం. అప్పటికే అతడు ప్రాణాలు కోల్పోయినట్లు వైద్యులు ప్రకటించారు' అని రోహిణీ ప్రాంత డీసీపీ ప్రణవ్ తయాల్ వివరించారు. 'తన భార్య గురించి అనుచిత వ్యాఖ్యలు చేశారని నిందితుడు ప్రాథమిక విచారణలో చెప్పాడు. తద్వారా తనను మానసిక వేధింపులకు గురిచేశారని తెలిపాడు' అని స్పెషల్ పోలీస్ కమిషనర్ దీపేంద్ర పాఠక్ రాయ్ వెల్లడించారు.