Odisha Road Accident: ఒడిశాలో ఘోర రోడ్డు ప్రమాదం జరిగి ఐదుగురు మరణించారు. వేగంగా వస్తున్న బొగ్గు లారీ.. ఆటోను బలంగా ఢీకొట్టింది. డెంకానల్ జిల్లాలో ఆదివారం ఉదయం జరిగిన ఈ ఘటనలో మైనర్ సహా ఐదుగురు అక్కడిక్కడే మృతి చెందారు. సమాచారం అందుకున్న పోలీసులు ఘటనాస్థలికి చేరుకుని కేసు నమోదు చేశారు. మృతదేహాలను పోస్టుమార్టం నిమిత్తం ఆసుపత్రికి తరలించారు. మృతులంతా బంగూర గ్రామానికి చెందిన వారని, ఆటోలో పని కోసం ముక్తపేసి ప్రాంతానికి వెళ్తున్నారని పోలీసులు తెలిపారు. లారీ డ్రైవర్ పరారీలో ఉన్నాడని, అతడి కోసం గాలిస్తున్నామని చెప్పారు.
వంతెనను ఢీకొట్టి.. బోల్తా పడ్డ కారు..
ఉత్తర్ప్రదేశ్లో జరిగిన మరో ఘోర ప్రమాదంలో ఐదుగురు ప్రాణాలు కోల్పోయారు. భగవాన్పుర్లో శనివారం వేగంగా వెళ్తున్న ఓ కారు వంతెనను ఢీకొట్టి, బోల్తా పడింది. అదే సమయంలో ఎదురుగా వస్తున్న బైక్ను ఢీకొట్టింది. ఈ ఘటనలో ఐదుగురు మరణించారు.
భగవాన్పుర్ కాలువ సమీపంలో అజంగఢ్ వైపు వెళ్తున్న కారు.. బ్రిడ్జిని బలంగా ఢీకొట్టి ఒక్కసారిగా బోల్తా పడిందని పోలీసులు చెప్పారు. కారులో ఉన్న నలుగురు అక్కడిక్కడే మరణించగా.. బైక్పై వెళ్తున్న వ్యక్తి కూడా చనిపోయాడని తెలిపారు. తీవ్రంగా గాయపడిన మరో ఇద్దరిని చికిత్స నిమిత్తం ఆసుపత్రికి తరలించామన్నారు.