భారత్లో మరోసారి కరోనా విజృంభణకు ప్రజలు నిబంధనలను పాటించకపోవడం, సార్స్ కోవ్-2 ఉద్ధృతంగా వ్యాపించడమే కారణమన్నారు ఎయిమ్స్ డైరెక్టర్ డా.రణ్దీప్ గులేరియా. ప్రస్తుత పరిస్థితి మారకపోతే దేశ ఆరోగ్య వ్యవస్థపై తీవ్ర ఒత్తిడి పడుతుందని సోమవారం హెచ్చరించారు.
"ఫిబ్రవరిలో కేసులు తగ్గుముఖం పడుతున్నప్పుడు వైరస్ తొలగిపోతోందని భావించి ప్రజలు కరోనా నిబంధనల పట్ల నిర్లక్ష్యం వహించారు. వ్యాధిని తేలిగ్గా తీసుకున్నారు. మార్కెట్లు, రెస్టారెంట్లు, ఇతరత్రా స్థలాల్లో గుంపులుగా తిరిగారు. గతంలో వైరస్ బారినపడిన ఒక వ్యక్తి ద్వారా 30మందికి వ్యాధి సోకితే.. ప్రస్తుతం ఇంకా ఎక్కువమందికి వ్యాపిస్తోంది. దీనికి కారణం.. సార్స్ కోవ్-2 మరింత తీవ్రంగా సంక్రమించడం కూడా కావొచ్చు.
ముఖ్యమైన పని అయితే గానీ ప్రజలు బయటకు రాకూడదు. క్షేత్రస్థాయిలో నిబంధనలు కఠినంగా అమలయ్యేలా అధికారులు చర్యలు తీసుకోవాలి. లేదంటే ఇప్పటి వరకు సాధించింది.. వృథాగా మిగులుతుంది."
- డా.రణ్దీప్ గులేరియా, ఎయిమ్స్ డైరెక్టర్