అసోంలో అసెంబ్లీ ఎన్నికల వేళ కీలక రాజకీయ పరిణామం చోటుచేసుకుంది. రాష్ట్రంలో కమలనాథులతో కలిసి నడవలేమని బోడోలాండ్ పీపుల్స్ ఫ్రంట్ (బీపీఎఫ్) ప్రకటించింది. కాంగ్రెస్ ఏర్పాటు చేసిన కూటమితో కలిసి పనిచేస్తామని బీపీఎఫ్ నేత హగ్రామా మొహిలరీ వెల్లడించారు.
ఈ నిర్ణయం కాంగ్రెస్ నేతృత్వంలోని అసోంలో ఏర్పాటైన కూటమి బలోపేతానికి ఎంతగానో ఉపకరించనుంది. రాష్ట్రంలో శాంతి, ఐక్యత, అభివృద్ధి, సుస్థిర ప్రభుత్వం, అవినీతి రహిత అసోం కోసం కాంగ్రెస్ కూటమితో కలిసి పనిచేయాలని నిర్ణయించుకున్నట్టు హగ్రామా ప్రకటించారు. భాజపాతో ఇక స్నేహం కొనగించలేమని, రాబోయే అసెంబ్లీ ఎన్నికల్లో ఆ కూటమితోనే కలిసి ముందుకెళ్తామని ఫేస్‌బుక్‌లో ప్రకటించారు.
మంత్రులు సైతం..
2016లో జరిగిన అసోం అసెంబ్లీ ఎన్నికల్లో మొత్తం 126 స్థానాలకు గాను బీపీఎఫ్ 12 స్థానాలు గెలుచుకుంది. అనంతరం భాజపా నేతృత్వంలోని కూటమి ప్రభుత్వంలో చేరింది. సర్వానంద్‌ సోనోవాల్‌ కేబినెట్‌లో బీపీఎఫ్ నుంచి ముగ్గురు మంత్రులుగా ఉన్నారు. అయితే, ఇటీవల అసోం ఆర్థికమంత్రి హిమంత బిశ్వశర్మ కూడా బీపీఎఫ్‌తో ఎన్నికల్లో పొత్తు ఉండదని స్పష్టంచేసిన నేపథ్యంలో ఈ నిర్ణయం వెలువడడం గమనార్హం.