'అది భాజపా సొమ్మేం కాదు- అందుకే అఖిలేశ్​ వణికిపోతున్నారు'

Nirmala On IT Raids: ఉత్తర్​ప్రదేశ్​లో ఇటీవల జరిగిన ఐటీ దాడుల గురించి మాట్లాడారు కేంద్ర ఆర్థిక మంత్రి నిర్మలా సీతారామన్​. పక్కా సమాచారంతో సరైన వ్యక్తిపైనే ఐటీ అధికారులు తనిఖీలు నిర్వహించారని తెలిపారు. బయటపడ్డ రూ. 200 కోట్లు.. భాజపా సొమ్మేం కాదని, పర్ఫ్యూమ్​ వ్యాపారి పీయూష్​ జైన్​దేనని స్పష్టం చేశారు.

Nirmala On IT Raids: ఇటీవల సంచలనంగా మారిన ఉత్తర్​ప్రదేశ్​ కన్నౌజ్​లో ఐటీ దాడులపై స్పందించారు కేంద్ర ఆర్థిక మంత్రి నిర్మలా సీతారామన్​. వేరే జైన్​ను టార్గెట్​ చేయాలనుకొని.. పీయూష్​ జైన్​పై ఆదాయపు పన్ను శాఖ పొరపాటున దాడి చేసిందంటూ విపక్షాలు, ముఖ్యంగా సమాజ్​వాదీ పార్టీ చేస్తున్న ఆరోపణలను ఖండించారు. పక్కా సమాచారంతో సరైన వ్యక్తిపైనే సరైన అడ్రస్​లోనే ఐటీ అధికారులు తనిఖీలు నిర్వహించారని ఆమె స్పష్టం చేశారు. పర్ఫ్యూమ్​ వ్యాపారి పీయూష్​ జైన్ ఇంటి నుంచే అధికారులు రూ. 200 కోట్లు స్వాధీనం చేసుకున్నారని, అదేం భాజపా సొమ్ము కాదని పేర్కొన్నారు నిర్మల.

నిఘా వర్గాల సమాచారం మేరకే ఆ రోజు పన్ను ఎగవేత కేసులో ఐటీ దాడులు నిర్వహించిందని ఆమె వెల్లడించారు. శుక్రవారం జరిగిన జీఎస్​టీ మండలి సమావేశం అనంతరం.. కేంద్ర మంత్రి మీడియాతో మాట్లాడారు. జైన్​ ఇంట్లో బయటపడ్డ రూ.197.49 కోట్లు భాజపాకు చెందినవనే ఆరోపణల్ని విలేకరులు ప్రస్తావించగా.. అదేం లేదని సమాధానమిచ్చారు.

Nirmala Sitharaman on Akhilesh Yadav: రెడ్​హ్యాండెడ్​గా పట్టుబడ్డ వ్యక్తి సమాజ్​వాదీ పార్టీ చీఫ్​ అఖిలేశ్​ యాదవ్​కు స్నేహితుడు లేదా భాగస్వామి​ కావొచ్చని.. అందుకే అఖిలేశ్​ వణికిపోయారని ఆరోపించారు నిర్మల. ఐటీ దాడుల వెనుక రాజకీయ ఒత్తిడి లేదని, అధికారులు ఏమన్నా ఖాళీ చేతులతో వచ్చారా? అని అన్నారు.

పీయూష్‌ ఇంట్లో దొరికిన సొమ్ము ఎవరిదో అఖిలేశ్‌ ఎలా చెప్పగలుగుతారని ప్రశ్నించారు. 'ఆ సొమ్ము ఎవరిదో మీకు ఎలా తెలుసు? మీరు అతడి భాగస్వామా? ఎవరి సొమ్ము దాచారన్నది భాగస్వాములకు మాత్రమే తెలుస్తుంది.' అని అఖిలేశ్‌కు చురకలు అంటించారు.

''ఆయన(సమాజ్​వాదీ చీఫ్​) సంస్థ వృత్తి నైపుణ్యాన్ని ప్రశ్నించకూడదు. చట్టాన్ని రక్షించే సంస్థలు తమ పని తాము చేసుకుపోతాయి. అధికారులు నిజాయితీగా పని చేశారనడానికి.. స్వాధీనం చేసుకున్న డబ్బే రుజువు. ఎన్నికలు అయిపోయిన తర్వాత ముహూర్తం చూసుకొని మేం దొంగను పట్టుకోవాలా? ఇప్పుడే ఆ పనిచేయాలా?''

- నిర్మలా సీతారామన్​, కేంద్ర ఆరోగ్య మంత్రి

Piyush Jain Kanpur Raid

జీఎస్​టీ ఎగవేత కేసులో ఉత్తర్ ​ప్రదేశ్‌లోని కాన్పుర్‌కు చెందిన వ్యాపారి పీయూష్​​ జైన్‌కు సంబంధించిన ఇళ్లు, కార్యాలయాల్లోఅధికారులు డిసెంబర్​ 24న తనిఖీలు నిర్వహించారు. కన్నౌజ్​లోని ఆడ్​కెమ్​ ఇండస్ట్రీస్​కు చెందిన ఇళ్లు, కార్యాలయాల్లో నుంచి.. ఇప్పటివరకు తాము రూ.197 కోట్ల నగదు, 26 కిలోల బంగారం, 600 కిలోల చందనం నూనెను స్వాధీనం చేసుకున్నామని డైరెక్టరేట్ జనరల్ ఆఫ్​ జీఎస్​టీ ఇంటెలిజెన్స్(డీజీజీఐ) అధికారులు తెలిపారు.

I-T Raids On Perfume Traders

దేశవ్యాప్తంగా ఉండే పర్ఫ్యూమ్ వ్యాపారుల ఇళ్లలో కూడా ఆదాయపన్ను శాఖ అధికారులు శుక్రవారం.. దాడులు నిర్వహిస్తున్నారు. పన్ను ఎగవేత విచారణలో భాగంగా ఈ సోదాలు నిర్వహిస్తున్నట్లు ఐటీ అధికారులు తెలిపారు. కాన్పుర్, కన్నౌజ్, ముంబయి, సూరత్​, దిల్లీతో పాటు ఇతర ప్రాంతాల్లో కూడా సోదాలు చేస్తున్నట్లు పేర్కొన్నారు.

సమాజ్​వాదీ పార్టీ ఎంఎల్​సీ పుష్పరాజ్​ అలియాస్​ పంపి జైన్​కు చెందిన కన్నౌజ్​లోని ఆయన నివాసంలో అధికారులు సోదాలు చేస్తున్నట్లు ఆ పార్టీ అధికారిక ట్విట్టర్​ పేజ్​లో షేర్​ చేసింది. అఖిలేశ్​ యాదవ్​.. కన్నౌజ్​లో మీడియా సమావేశానికి పిలుపునిచ్చిన సందర్భంగా భాజపా ప్రభుత్వం ఐటీ రైడ్స్​కు తెర తీసిందని పేర్కొంది.

వచ్చే ఏడాది ఎన్నికలను దృష్టిలో ఉంచుకొని ఇటీవల సమాజ్​వాదీ పేరుతో పుష్పరాజ్​ ఓ పర్ఫ్యూమ్​ను విడుదల చేశారు.

IT raids businessman Anoop Jain:

అనూప్​ జైన్​ ఇంట్లో ఐటీ విభాగం దాడులు

కాన్పుర్​కు చెందిన వ్యాపారవేత్త అనూప్​ జైన్​ ఇంట్లో కూడా ఐటీ అధికారులు దాడులు నిర్వహిస్తున్నారు. అనూప్​ కోల్డ్​ స్టోరీజీ కాంట్రాక్టర్​.

ఇవీ చూడండి: కొత్త ఏడాదికి ఆర్థిక ప్రణాళిక వేసుకోండిలా..!