'మహిళల విషయంలో ఇక ఆ పదాలు వాడొద్దు'.. సుప్రీంకోర్టు హ్యాండ్​ బుక్​ రిలీజ్​

Supreme Court Handbook on Combating Gender Stereotypes : న్యాయస్థానాల్లో విచారణ, తీర్పుల సమయంలో లింగ వివక్షకు తావు లేకుండా పదాలను వినియోగించడంపై ఓ హ్యాండ్‌బుక్‌ను విడుదల చేసింది సుప్రీం కోర్టు. కోర్టులు గతంలో ఇచ్చిన తీర్పుల్లో మహిళలను ప్రస్తావిస్తూ చేసిన అనేక అనుచిత పదాలను హ్యాండ్​ బుక్​లో పొందుపరిచింది.

Supreme Court Handbook on Combating Gender Stereotypes : కోర్టుల్లో కేసుల విచారణ, తీర్పుల్లో మహిళల పట్ల లింగ వివక్ష లేకుండా చూసే విషయంలో కీలక ముందడుగు పడింది. విచారణ సమయంలో మహిళల ప్రస్తావనలో ఉపయోగించాల్సిన పదాలు, వాక్యాలకు సంబంధించి ఓ హ్యాండ్‌బుక్‌ను బుధవారం ఉదయం విడుదల చేసింది సుప్రీంకోర్టు. కోర్టు తీర్పు వెలువరించే సమయంలో అనుచిత పదాలు వాడకుండా ఉండేందుకు న్యాయమూర్తులకు తగు సూచనలు చేసింది. 'హ్యాండ్‌బుక్‌ ఆన్‌ కంబాటింగ్‌ జెండర్‌ స్టీరియోటైప్స్‌' పేరుతో 30 పేజీల పుస్తకాన్ని విడుదల చేశారు సుప్రీంకోర్టు ప్రధాన న్యాయమూర్తి జస్టిస్‌ డీవై చంద్రచూడ్‌. ఇందులో మహిళలను కించపరిచే విధంగా ఉన్న 40 పదాలను గుర్తించింది సర్వోన్నత న్యాయస్థానం. కోర్టులు గతంలో ఇచ్చిన తీర్పుల్లో మహిళలను ప్రస్తావిస్తూ చేసిన అనేక అనుచిత పదాలను హ్యాండ్​ బుక్​లో పొందుపరిచింది. వాటి బదులుగా వాడాల్సిన పదాలను సూచించింది.

సుప్రీం కోర్టు విడుదల చేసిన హ్యాండ్​ బుక్​

"కోర్టు తీర్పుల్లో మహిళలపై వివక్ష చూపే విధంగా వినియోగించే పదాలు సరైనవి కావు. అయితే, ఆ తీర్పులను విమర్శించడం ఈ పుస్తకం ఉద్దేశం కాదు. లింగత్వానికి సంబంధించి మూసపద్ధతులు ఎలా ఆచరణలో ఉన్నాయో చెప్పేందుకే ఈ పుస్తకాన్ని రూపొందించాం"

--జస్టిస్‌ డీవై చంద్రచూడ్‌, ప్రధాన న్యాయమూర్తి

Gender Stereotypes Supreme Court :లింగ వివక్షకు నిర్వచనం, న్యాయాధికారుల్లో అవగాహనను పెంపొందించడమే ఈ హ్యాండ్‌బుక్‌ లక్ష్యమని జస్టిస్‌ డీవై చంద్రచూడ్‌ పేర్కొన్నారు. మహిళలపై మూసధోరణిలో వాడే పదాలను గుర్తించేందుకు న్యాయమూర్తులకు ఇది ఎంతో ఉపయోగపడుతుందని చెప్పారు. సుప్రీం కోర్టు వెబ్‌సైట్‌లో ఇది అందుబాటులో ఉంటుందని ప్రధాన న్యాయమూర్తి వివరించారు.

సుప్రీం కోర్టు విడుదల చేసిన హ్యాండ్​బుక్​లోని పదాలు

SC on Stereotypical Words : సరైన పద్ధతులను అనుసరించకుండా మూస పద్ధతిని అనుసరించడం 'చట్టం ముందు అందరూ సమానమే' అన్న భావనకు వ్యతిరేకమని సుప్రీం కోర్టు అభిప్రాయపడింది. న్యాయ విచారణ అనేది ప్రతి కేసు నేపథ్యం ఆధారంగా జరగాలని.. మూస పద్ధతిలో కాదని సర్వోన్నత న్యాయస్థానం చెప్పింది. ఈ నిర్ణయం భారత న్యాయ వ్యవస్థలో మహిళలు వివక్షకు గురికాకుండా ఉండాలనే లక్ష్యంతోనే తీసుకున్నందని వివరించింది.