హిందూ మహాసముద్రంలో కొత్త రకం బ్లూవేల్స్

పశ్చిమ హిందూ మహాసముద్రంలో కొత్త రకం బ్లూవేల్స్​ను శాస్త్రవేత్తలు కనుగొన్నారు. సముద్రంలో వివిధ ధ్వనులను విశ్లేషించి వీటి జాడను గుర్తించారు. ఈ తిమింగలాల గురించి మరిన్ని వివరాలను వెలుగులోకి తీసుకురావాలని భావిస్తున్నారు.

ఇప్పటివరకూ వెలుగు చూడని ఒక కొత్త రకం నీలివర్ణపు తిమింగలాల(బ్లూ వేల్స్)ను పశ్చిమ హిందూ మహాసముద్ర ప్రాంతంలో శాస్త్రవేత్తలు గుర్తించారు. ఆ ప్రాంతం నుంచి వస్తున్న శబ్దాలను విశ్లేషించడం ద్వారా వారు ఈ ఆవిష్కారం చేశారు. ఈ భారీ మత్స్యాలు ప్రపంచవ్యాప్తంగా విస్తరించిన తీరు గురించి మరిన్ని వివరాలను వెలుగులోకి తీసుకురావొచ్చని భావిస్తున్నారు.

అమెరికాలోని 'న్యూ ఇంగ్లండ్ అక్వేరియం' శాస్త్రవేత్తలు ఈ ఆవిష్కారం చేశారు. భూమి మీదున్న జీవజాలంలో బ్లూవేల్స్ అతిపెద్దవి. అయితే అవి అంతరించిపోయే ముప్పును ఎదుర్కొంటున్నాయి. ఈ జీవులు చాలా తక్కువ శ్రుతిలో రాగాలు ఆలపిస్తుంటాయి. స్థాయి తక్కువగా ఉన్నప్పటికీ వాటిని మనం వినొచ్చు.

బ్లూవేల్స్​లో అనేక రకాలు ఉన్నాయి. ఒక్కో జాతి ఒక్కో రకం రాగాన్ని ఆలపిస్తుంది. తాజాగా శాస్త్రవేత్తలు ఒమన్​లోని అరేబియా సముద్ర తీరం నుంచి మడగాస్కర్ వరకూ ఉన్న సముద్ర ప్రాంతంలో నమోదు చేసిన ధ్వనులను విశ్లేషించారు. అందులో.. ఇంతవరకూ వెలుగుచూడని ఒక బ్లూవేల్ రాగాన్ని గుర్తించారు. పశ్చిమ హిందూ మహాసముద్రంలో ఒక కొత్త బ్లూవేల్ జాతికి సంబంధించిన స్వరంగా దీన్ని తేల్చారు.

ఇదీ చదవండి:చైనాకు చెక్​ పెట్టేందుకు లద్దాఖ్​లో 36 కొత్త హెలిప్యాడ్లు