'కొవిడ్​ అనంతరం కొత్త ఉపాధి అవకాశాలు'

భారత్​, నెదర్లాండ్​ లాంటి ప్రజాస్వామ్య దేశాల మధ్య ద్వైపాక్షిక సంబంధాలు మెరుగైతే ఇరు దేశాల్లో ఉపాధి అవకాశాలు పెరుగుతాయని ప్రధాని నరేంద్ర మోదీ తెలిపారు. భారత్​-యూరోపియ్​ యూనియన్​ సమ్మిట్​లో ఇరుదేశాలకు సంబంధించి కొత్త అవకాశాల గురించి చర్చిద్దామని నెదర్లాండ్​ ప్రధాన మంత్రి మార్క్​ ర్యూట్​తో వర్చువల్ సమావేశంలో మోదీ ఈ వ్యాఖ్యానించారు.

భారత్​, నెదర్లాండ్​ వంటి ప్రజాస్వామ్య దేశాలు ద్వైపాక్షిక సంబంధాలను మెరుగుపరుచుకుంటే కొవిడ్​ అనంతరం ఇరుదేశాలలో ఉపాధి అవకాశాలు పెరుగుతాయని ప్రధాని నరేంద్ర మోదీ అన్నారు. నెదర్లాండ్​ ప్రధాన మంత్రి మార్క్​ ర్యూట్​తో జరిగిన వర్చువల్ సమావేశంలో మోదీ ఈ వ్యాఖ్యలు చేశారు.

వరుసగా నాలుగోసారి ప్రధాన మంత్రిగా ఎన్నికైనందుకు మార్క్​కు మోదీ శుభాకాంక్షలు తెలిపారు. కరోనా సమయంలో నెదర్లాండ్​లో ఉన్న భారతీయుల రక్షణపై ప్రత్యేక చర్యలు తీసుకుంటున్నందుకు ధన్యవాదాలు తెలిపారు.

"వాతావరణ మార్పులు, ఉగ్రవాదం, కరోనా తదితర సమస్యలపై ఇరు దేశాలు ఒకే దృక్పథంతో ఉన్నాయి. ఇండో-ఫసిఫిక్​ లాంటి కఠినమైన అంశాల్లో కూడా ఇరు దేశాలు కలిసి పనిచేయబోతున్నాయి. అంతేకాకుండా సముద్ర జలాల వ్యాపారం, రవాణా విషయంలో ఇరు దేశాల వ్యూహాత్మక సంబంధాలు కొత్త పుంతలు తొక్కనున్నాయి."

-నరేంద్ర మోదీ, భారత ప్రధాని

కాప్​26, భారత్​-యూరోపియన్​ యూనియన్​ సమ్మిట్​లో ఇరుదేశాలకు సంబంధించి కొత్త అవకాశాల గురించి చర్చిద్దామని అన్నారు.

"కొవిడ్​ కష్టకాలంలోనూ డచ్​ వ్యాపారులకు, పెట్టుబడిదారులకు అండగా నిలిచి వాణిజ్యాన్ని కొనసాగించినందుకు ధన్యవాదాలు. అంతేకాకుండా ఎయిర్​ బబుల్ ఒప్పందం​ కుదిరి.. తద్వారా భారత్​లో ఉన్న తమ పౌరుల్ని, ఐరోపా పౌరుల్ని ఇక్కడికి పంపినందుకు, అలాగే నెదర్లాండ్​లో ఉన్న భారత పౌరులు.. వారి స్వస్థలాలకు వచ్చేలా చేసినందుకు ధన్యవాదాలు."

-మార్క్​ ర్యూట్​, నెదర్లాండ్​ ప్రధాని

ఇదీ చదవండి:ప్రిన్స్​ ఫిలిప్​కు మోదీ సహా ప్రపంచ నేతల నివాళి