పాదయాత్రలో ఇచ్చిన ప్రతి హామీని నిలబెట్టుకుంటా - విశాఖలో ముగిసిన నారా లోకేశ్ యువగళం

Nara Lokesh Yuvagalam Padayatra: జన జైత్రయాత్రను తలపిస్తూ నారా లోకేశ్ యువగళం పాదయాత్ర దిగ్విజయంగా ముగిసింది. పాదయాత్ర చివరి రోజున ప్రజలు, మహిళలు పెద్ద సంఖ్యలో తరలివచ్చి యువనేతకు బ్రహ్మరథం పట్టారు. పార్టీ శ్రేణుల్లో సమరోత్సాహంతో గాజువాక దద్దరిల్లింది. వేలాది మంది జనసంద్రం మధ్య శివాజీనగర్ వద్ద లోకేశ్ పైలాన్‌ను ఆవిష్కరించారు.

Nara Lokesh Yuvagalam Padayatra: అణిచివేతకు గురైన వర్గాల గొంతుకే యువగళం అంటూ తెలుగుదేశం జాతీయ ప్రధాన కార్యదర్శి నారా లోకేశ్ పైలాన్ వద్ద తన సందేశాన్నిచ్చారు. ప్రజాగళమై, ప్రజలే బలమై 226 రోజులు, 3వేల132 కిలోమీటర్ల పాదయాత్ర దిగ్విజయంగా కొనసాగిందని గుర్తుచేశారు.

ప్రతి హామీని నిలబెట్టుకుంటా: అసమర్థుడు గద్దెనెక్కి ప్రజాస్వామ్యంపై చేసిన దాడిని, వ్యవస్థల విధ్వంసాన్ని కళ్లారా చూశానని లోకేశ్ చెప్పారు. భవిష్యత్తుపై ఆశలు కోల్పోయిన యువతకు భరోసా ఇచ్చాననే విశ్వాసం వ్యక్తపరిచారు. అందరి సహకారంతో యువగళం పాదయాత్రను విజయవంతంగా గాజువాక నియోజకవర్గం అగనంపూడి వద్ద ముగిస్తున్నానన్నారు. పాదయాత్రలో తాను ఇచ్చిన ప్రతి హామీకి కట్టుబడి ఉంటానని స్పష్టం చేశారు. ప్రజా ప్రభుత్వం ఏర్పడిన వెంటనే ఇచ్చిన ప్రతి హామీని నిలబెట్టుకుంటానని తెలిపారు.

Nara Lokesh Yuvagalam Last Day: జనగళమే యువగళమై 226 రోజులపాటు అప్రతిహతంగా కొనసాగిన యువనేత నారా లోకేశ్ పాదయాత్ర దిగ్విజయంగా పూర్తయింది. కార్యకర్తలు, అభిమానుల జయజయధ్వానాల నడుమ గాజువాక ప్రకాష్ నగర్​లో సోమవారం సాయంత్రం పాదయాత్ర విజయవంతమైనందుకు గుర్తుగా నారా లోకేశ్ పైలాన్​ను ఆవిష్కరించారు.

అభిమానుల కోలాహలం: గతంలో చంద్రబాబు చేపట్టిన వస్తున్న మీకోసం పాదయాత్ర ఎక్కడైతే ముగించారో అక్కడే యువగళం పాదయాత్రనూ లోకేశ్ ముగించారు. ఈ సందర్భంగా జై లోకేశ్, జై తెలుగుదేశం నినాదాలతో ఆ ప్రాంతం హోరెత్తింది. ఉదయం విశాఖలోని ఉక్కునగరం సీడబ్యూసీ-1 ప్రాంతం నుంచి ప్రారంభమైన పాదయాత్ర కార్యకర్తలు, అభిమానుల కోలాహలం నడుమ ఉత్సాహంగా సాగింది.

అడుగడుగునా నీరాజనాలు: అడుగడుగునా ప్రజలు యువనేతకు నీరాజనాలు పట్టారు. లోకేశ్​తో పాటు తల్లి నారా భువనేశ్వరి, అత్త నందమూరి వసుంధరాదేవి, ఇతర కుటుంబసభ్యులు కలిసి నడిచారు. యువగళం పాదయాత్రలో భాగస్వామ్యం అయిన ప్రజలు, పార్టీ నాయకులు, కార్యకర్తలు, సిబ్బంది అందరికీ పేరుపేరునా లోకేశ్ ధన్యవాదాలు తెలిపారు. ప్రజా ప్రభుత్వం ఏర్పడిన వెంటనే ఇచ్చిన ప్రతి హామీని నిలబెట్టుకుంటానని స్పష్టం చేశారు.

యువగళం చివరిరోజైన 226వ రోజు యువనేత లోకేశ్ 13 కిలోమీటర్ల పాదయాత్ర చేశారు. మొత్తం 226 రోజుల్లో 3132 కి.మీ.ల మేర సాగిన యువగళం పాదయాత్ర అరాచకపాలనపై ప్రజలను చైతన్యవంతం చేయడంలో సంపూర్ణంగా విజయం సాధించింది. మరికొద్దినెలల్లో రాబోయే సార్వత్రిక ఎన్నికల్లో తెలుగుదేశం పార్టీ సత్తా చాటుతుందనేందుకు యువగళం పాదయాత్ర పునాది వేసింది.

నవశకం బహిరంగ సభ: యువగళం పాదయాత్ర విజయవంతంగా ముగిసిన సందర్భంగా ఈనెల 20వ తేదీ సాయంత్రం 3 గంటలకు భోగాపురం సమీపంలోని పోలిపల్లి వద్ద యువగళం – నవశకం పేరిట భారీ బహిరంగ సభ నిర్వహించనున్నారు. ఈ సభకు చంద్రబాబునాయుడు, పవన్ కల్యాణ్​, బాలకృష్ణతోపాటు అతిరథ మహారధులంతా హాజరుకానున్నారు.

రాష్ట్రంలో జగన్మోహన్ రెడ్డి అరాచకపాలనపై ప్రజాచైతన్యమే లక్ష్యంగా ఈ ఏడాది జనవరి 27వ తేదీన కుప్పం శ్రీ వరదరాజస్వామి పాదాల చెంతనుంచి ప్రారంభమైన యువగళం పాదయాత్ర 226 రోజులు, 3132 కి.మీ.ల మేర అవిశ్రాంతంగా కొనసాగి విశాఖ జిల్లా అగనంపూడి వద్ద దిగ్విజయంగా పూర్తయింది.

వారి పాత్ర అనిర్వచనీయం: ఈ సుదీర్ఘమైన మజిలీ 11 ఉమ్మడి జిల్లాల్లోని 97 అసెంబ్లీ నియోజకవర్గాల మీదుగా సాగింది. యువగళం పవిత్రయజ్ఞాన్ని ముందుకు నడిపించడంలో యువగళం కమిటీల పాత్ర అనిర్వచనీయమని లోకేశ్ కొనియాడారు. అధికారపార్టీ సైకోలు ఎన్నో కవ్వింపు చర్యలకు పాల్పడినా సంయమనంతో లక్ష్యాన్ని చేరుకునేందుకు సహకరించారని వారిని ప్రశంసించారు.

అందరికీ అండగా ప్రజాప్రభుత్వం నిలుస్తుంది: యాత్ర కొనసాగుతున్న సమయంలో ఎన్ని ఇబ్బందులు ఎదురైనా రేయింబవళ్లు తన వెన్నంటే ఉంటూ సేవలందించారని గుర్తు చేసుకున్నారు. రాబోయే రోజుల్లో తెలుగుదేశం పార్టీ సాధించబోయే అప్రతిహతమైన విజయాలకు మన యువగళం పునాది వేసిందని పేర్కొన్నారు. మరో 3 నెలల్లో చంద్రన్న నేతృత్వాన ఏర్పాటయ్యే ప్రజాప్రభుత్వం అందరికీ అండగా నిలుస్తుందని హామీ ఇచ్చారు.