66 మందికి కరోనా.. అసెంబ్లీ సమావేశాలు వాయిదా

మధ్యప్రదేశ్​ అసెంబ్లీ శీతాకాల సమావేశాలు వాయిదా పడ్డాయి. నేడు సెషన్​ ప్రారంభం కానున్న నేపథ్యంలో.. ముందుగా నిర్వహించిన కరోనా పరీక్షల్లో మొత్తం 66 మందిలో వైరస్​ బయటపడింది. ఇందులో ఐదుగురు ఎమ్మెల్యేలు ఉన్నారు. ఈ కారణంగానే సమావేశాలను వాయిదా వేశారు.

కరోనా కారణంగా మధ్యప్రదేశ్​ అసెంబ్లీ సమావేశాలు వాయిదా పడ్డాయి. నేడు సమావేశాలు ప్రారంభం కానుండగా.. ముందస్తుగా నిర్వహించిన కరోనా పరీక్షల్లో 66 మందికి కొవిడ్​ పాజిటివ్​గా తేలింది. ఇందులో అధికారులు, సిబ్బంది సహా ఐదుగురు ఎమ్మెల్యేలు ఉన్నారు. ఈ నేపథ్యంలో అఖిలపక్ష భేటీ అనంతరం.. 3 రోజుల అసెంబ్లీ సెషన్​ను వాయిదా వేస్తున్నట్లు ప్రకటన వెలువడింది. ఈ మేరకు అసెంబ్లీ ప్రిన్సిపల్​ సెక్రటరీ ఏపీ సింగ్​ మీడియాకు వెల్లడించారు.

ఇంకా అందరు శాసనసభ్యుల రిపోర్టులు రాలేదని ప్రొటెం స్పీకర్​ రామేశ్వర్​ శర్మ పేర్కొన్నారు. ఎమ్మెల్యేలు, వారి సిబ్బంది అంతా పరీక్షలు చేయించుకోవాలని ఆయన సూచించారు.

మధ్యప్రదేశ్​లో ఇప్పటివరకు 2 లక్షల 30 వేల కేసులు బయటపడ్డాయి. వీరిలో 3545 మంది మరణించారు. దేశవ్యాప్తంగా కేసులు కోటి దాటగా.. 97 లక్షల మంది కోలుకున్నారు. లక్షా 47 వేల మంది మృత్యువాతపడ్డారు.

ఇదీ చూడండి:నాలుగు రాష్ట్రాల్లో కరోనా వ్యాక్సిన్​ డ్రై రన్​