జీన్స్ వేసుకోమంటున్న అత్త- చీరలే కట్టుకుంటానన్న పల్లెటూరి కోడలు- పోలీస్​స్టేషన్​కు పంచాయతీ!

Mother In Law Daughter In Law Fight : రోజూ జీన్స్​ వేసుకునే అత్త.. కోడలు కూడా అలాంటి దుస్తులు వేసుకోవాలని ఒత్తిడి తెస్తోంది. చీర కట్టుకుంటే ఎగతాళి చేసి గొడవ పెడుతోంది. దీంతో ఆ ఒత్తిడి తట్టుకోలేక.. కోడలు ఫ్యామిలీ కౌన్సిలింగ్​ సెంటర్​ను ఆశ్రయించింది. ఈ ఘటన ఎక్కడ జరిగింది? చివరకు ఏమైంది?

Mother In Law Daughter In Law Fight : ఉత్తర్​ప్రదేశ్​లోని ఆగ్రాలో అత్తాకోడళ్ల మధ్య జరిగిన గొడవ.. ప్రస్తుతం స్థానికంగా చర్చనీయాంశమైంది. రోజూ జీన్స్​ ధరించే అత్త.. కోడలు కూడా జీన్సే వేసుకోవాలని ఒత్తిడి తెస్తోంది. తనకు చీర కట్టుకోవడమే ఇష్టమని చెబుతున్నా.. తన అత్త వినట్లేదని కోడలు వాపోతోంది. చేసేదేం లేక ఫ్యామిలీ కౌన్సిలింగ్ సెంటర్​ను కోడలు ఆశ్రయించింది.

వివరాల్లోకి వెళ్తే..
హరిపర్వత్​ పోలీస్​స్టేషన్​ పరిధికి చెందిన ఓ యువకుడికి.. ఎత్మాద్​పుర్​ పోలీస్​స్టేషన్​ పరిధిలో ఉంటున్న యువతితో ఏడాది క్రితం వివాహమైంది. యువకుడు ఓ ప్రైవేట్​ కంపెనీలో పనిచేస్తుండగా.. యువతి హౌస్​వైఫ్​. జీన్స్​ అలవాటు లేని ఆ యువతి.. రోజూ చీరలే కట్టుకుంటోంది. అది నచ్చని ఆమె అత్త.. కోడలిని ఎగతాళి చేస్తోంది. తనలాగా జీన్స్ మాత్రమే వేసుకోవాలని ఒత్తిడి తెస్తోంది. రోజూ ఇంట్లో ఇదే తంతు జరుగుతుండడం వల్ల.. కోడలు తాజాగా ఆగ్రా పోలీస్​స్టేషన్​లోని ఫ్యామిలీ కౌన్సిలింగ్​ సెంటర్​ను ఆశ్రయించింది. జరిగినదంతా వివరించింది. ఫిర్యాదు అందుకున్న కౌన్సిలింగ్​ సెంటర్​ ఆమెతో పాటు అత్త, భర్తను పిలిపించారు.

తాను గ్రామీణ వాతావరణం నుంచి వచ్చానని.. పెళ్లి తర్వాత చీరలు కట్టుకోవడమే తనకు తెలుసని కోడలు.. ఫ్యామిలీ కౌన్సిలింగ్​ సెంటర్​లో చెప్పింది. "నాకు చీర కట్టుకోవడమే ఇష్టం. కానీ అది మా అత్తకు ఇష్టంలేదు. చీర కట్టుకుంటే ఎగతాళి చేస్తోంది. జీన్స్​ వేసుకోమని చెబుతోంది. ఆ నెపంతో గొడవ పడుతోంది. నాకు జీన్స్​ వేసుకోవడం ఇష్టం లేదు. మా అత్త జీన్స్​ ధరించడం కూడా నాకు ఇష్టం లేదు. ఈ విషయం నా భర్తకు చెబితే తిరిగి నన్నే తిడుతున్నారు. జీన్స్​ వేసుకోమంటున్నారు. వేసుకోనంటే కొడుతున్నారు" అని కోడలు ఆరోపించింది. అయితే రోజూ ఇంట్లో తన తల్లి, భార్య మధ్య గొడవలతో తాను విసిగిపోయానని యువకుడు తెలిపాడు. తన తల్లి మాటను భార్య వినడం లేదని చెప్పాడు.

తమ సెంటర్​కు గొడవల కారణంగా విచ్చేసిన భార్యాభర్తలు, అత్తాకోడళ్ల మధ్య సయోధ్య కుదిర్చేందుకు కృషి చేస్తామని ఫ్యామిలీ కౌన్సిలింగ్​ సెంటర్​ నోడల్​ ఏసీపీ సుకన్య శర్మ తెలిపారు. అయితే వీరి విషయంలో మాత్రం ఇంకా సయోధ్య కుదరలేదని చెప్పారు. మరోసారి కౌన్సిలింగ్​కు పిలిపించినట్లు వెల్లడించారు.