Mother Tortured Daughter: సినిమా మోజు.. కుమార్తెకు ఇంజక్షన్లు.. వద్దన్నా వదలని తల్లి

Mother Gave Drug Injections to Her Daughter: కుమార్తెను హీరోయిన్ చేయాలనుకున్న ఓ తల్లి.. అడ్డదార్లు తొక్కి కన్నబిడ్డపై కర్కశంగా వ్యవహరించింది. బాలికను త్వరగా పెద్దదాన్ని చేసేందుకు డ్రగ్ ఇంజక్షన్లు ఇవ్వటం మొదలు పెట్టింది. బాధ భరించలేని కుమార్తె వద్దంటూ.. తల్లిని ఎంత వేడుకున్నా విడిచిపెట్టలేదు. కన్నతల్లి చెరలో చిక్కుకుని నరకయాత అనుభవించింది.. తెలిసిన వాళ్ల సాయంతో 1098కు ఫోన్​ చేయడంతో బాలిక విషాద గాథ వెలుగుచూసింది.

Mother Gave Drug Injections to Her Daughter: సినిమా ప్రపంచంపై ఉన్న మక్కువతో ఓ తల్లి.. తన కుమార్తెను హీరోయిన్​ను చేయాలని అనుకుంది. అంతవరకూ బాగానే ఉంది. అయితే కుమార్తె వయసు చిన్నది కావటంతో.. ఆమెకు డ్రగ్ ఇంజక్షన్లు ఇచ్చి త్వరగా పెద్దదాన్ని చేసేయాలని అనుకుంది. బాలికను త్వరగా పెద్దదాన్ని చేసేందుకు డ్రగ్ ఇంజక్షన్లు ఇవ్వటం మొదలు పెట్టింది. బాధ భరించలేని కూతురు వద్దంటూ.. తల్లిని ఎంత వేడుకున్నా.. విడిచిపెట్టేదికాదు. దీంతోపాటు ఆ బాలికను వ్యభిచార కూపంలోకి కూడా దించి.. కన్నబిడ్డతో వ్యాపారం చేయాలని అనుకుంది. బాలిక అందుకు సహకరించపోవటంతో చిత్రహింసలకు గురిచేసేది. ఈ హృదయవిదారక ఘటన విజయనగరంలో వెలుగులోకి వచ్చింది. అసలేం జరిగిందంటే..?

పోలీసులు తెలిపిన సమాచారం ప్రకారం.. విజయనగరంలోని తోటపాలెం దగ్గరలో ఓ వివాహిత(40) నివాముంటోంది. ఆమెకు ఒక కుమార్తె పుట్టిన తర్వాత.. భర్త చనిపోయాడు. దీంతో ఆ మహిళ మరో వ్యక్తిని వివాహమాడింది. రెండో భర్తతో ఆమెకు ఇద్దరు పిల్లలు పుట్టారు. అయితే ఆమె ప్రవర్తన నచ్చకపోవటంతో రెండో భర్త.. తన ఇద్దరు బిడ్డలను తీసుకుని వెళ్లిపోయాడు. ప్రస్తుతం ఆ మహిళ మరో వ్యక్తితో కలిసి సహజీవనం చేస్తోంది.

ఇదిలా ఉండగా.. ఆ మహిళ మొదటి భర్తకు పుట్టిన కుమార్తె(15) విశాఖలోని ప్రభుత్వ విద్యాసంస్థలో ఇటీవల పదో తరగతి పూర్తి చేసుకుంది. వేసవి సెలవులు కావడంతో బాధిత బాలిక తన తల్లి దగ్గరకు వచ్చింది. అయితే తరచుగా వారి ఇంటికి ఎవరెవరో వచ్చిపోతుండేవారు. వారిలో ఓ వ్యక్తి ఆ బాలికను చూసి.. ఆమెకు హీరోయిన్ అయ్యే లక్షణాలు ఉన్నాయని ఆమె తల్లితో చెప్పాడు. అయితే బాలిక వయస్సు చిన్నది కావటంతో.. ఆమె అవయవాలు త్వరగా పెరుగుదల అయ్యేందుకు.. డ్రగ్ ఇంజక్షన్లు ఇవ్వాలని సూచించాడు.

దీంతో ఆ మహిళ తన కుమార్తెకు డ్రగ్ ఇంజక్షన్లు ఇవ్వటం మొదలుపెట్టింది. దీంతోపాటు బాలికను కూడా వ్యభిచార కూపంలోకి దించాలని అనుకుంది. ఫలానా వ్యక్తి దగ్గరకు వెళ్తే.. సినిమాల్లో నటించే అవకాశాలు వస్తాయని, మంచి భవిష్యత్తు ఉంటుందని చెప్పి కుమార్తెకు ప్రలోభపెట్టేది. అయితే బాలిక అందుకు ఒప్పుకునేది కాదు. దీంతో ఆ మహిళ కుమార్తెను చిత్రహింసలకు గురిచేసేది. బాలికను ఎలా అయినా దారిలోకి తెచ్చుకోవాలని పలుమార్లు బాలికకు నిద్రమాత్రలు కూడా ఇచ్చింది.

వీటివల్ల అభం శుభం తెలియని బాలిక బాధ భరించలేక వద్దంటూ.. తల్లిని వేడుకునేది. అయినా కూడా ఆ మహిళ విడిచిపెట్టేది కాదు. ఈ క్రమంలో బాలిక అనారోగ్యం బారిన పడింది. ఆ నరకయాతన భరించలేని బాలికకు ఏం చేయాలో తోచక తనకు తెలిసిన వారి సహాయంతో గురువారం రాత్రి 1098కు కాల్ చేసింది. చైల్డ్​లైన్ సిబ్బందికి తన దీనస్థితిని వివరించింది. వెంటనే వారు జిల్లా అధికారులకు సమాచారాన్ని అందించారు. పోలీసుల సహకారంతో వారు అక్కడకు వెళ్లి బాలికను ఆ చెర నుంచి విడిపించి.. విముక్తి కలిగించారు.

బాలికను అధీనంలోకి తీసుకుని విశాఖపట్నంలోని స్వధార్ హోమ్​కు పంపించారు. ఈ దారుణమైన ఘటనపై కేసు నమోదు చేయాలని దిశ పోలీసులను కోరినట్లు రాష్ట్ర బాలల హక్కుల పరిరక్షణ కమిటీ ఛైర్మన్ కేసలి అప్పారావు తెలిపారు. బాలలు ఎక్కడైనా ఈ విధంగా ఇబ్బందులకు గురైతే, ధైర్యంగా బాలల రక్షణ కోసం పని చేస్తున్న సంస్థలను సంప్రదించాలని సూచించారు. వారికి అన్ని విధాలా అండగా ఉంటామని ఆయన భరోసా ఇచ్చారు.