టీకా ఉత్సవ్: తొలి రోజు 27 లక్షల మందికి వ్యాక్సిన్​

దేశవ్యాప్తంగా 'టీకా ఉత్సవ్' జోరుగా సాగుతోంది. ఈ కార్యక్రమంలో భాగంగా తొలి రోజు 27 లక్షల మందికి పైగా టీకా అందించినట్లు కేంద్ర ఆరోగ్య శాఖ పేర్కొంది. మొత్తంగా 10 కోట్ల 43 లక్షల డోసులు పంపిణీ చేసినట్లు తెలిపింది.

అర్హులైనవారందరికీ టీకా అందించడమే లక్ష్యంగా ప్రధాని నరేంద్ర మోదీ సూచన మేరకు నిర్వహిస్తున్న'టీకా ఉత్సవ్'​లో భాగంగా తొలి రోజు 27 లక్షల మందికి పైగా టీకా తీసుకున్నారు. ఈ విషయాన్ని కేంద్ర ఆరోగ్య శాఖ వెల్లడించింది. ఈ టీకా ఉత్సవ్​ కార్యక్రమాన్ని ఏప్రిల్ 11 నుంచి 14 వరకు నిర్వహించనున్నారు.

"ప్రతి రోజు 45 వేల కొవిడ్ వ్యాక్సినేషన్ కేంద్రాల్లో టీకా ఇచ్చేవారు. కానీ, ఆదివారం 63 వేల కేంద్రాల్లో టీకా ఇచ్చారు. 'టీకా ఉత్సవ్​'లో భాగంగా 18,800 వ్యాక్సినేషన్​ కేంద్రాలను పెంచారు. సాధారణంగా ఆదివారాల్లో దాదాపు 16 లక్షల మంది మాత్రమే టీకా తీసుకునేవారు. కానీ, ఈసారి 27 లక్షల మంది టీకా తీసుకున్నారు."

--కేంద్ర ఆరోగ్య శాఖ.

ఆదివారం 8 గంటల లోపు 27,69,888 మందికి టీకా ఇచ్చినట్లు ఆరోగ్య శాఖ పేర్కొంది. మొత్తంగా 10 కోట్ల 43 లక్షల

టీకా డోసులు పంపిణీ చేసినట్లు పేర్కొన్నారు.

టీకా తొలి డోసు తీసుకున్న వారు

ఆరోగ్య సిబ్బంది-90,12,768

ఫ్రంట్​లైన్​ వర్కర్లు- 99,94,360

రెండో డోసు తీసుకున్న వారు

ఆరోగ్య సిబ్బంది- 55,23,718

ఫ్రంట్​లైన్ వర్కర్లు-47,93,536

4 కోట్ల 4 లక్షలకు పైగా వృద్ధులు కొవిడ్ టీకా తొలి డోసు తీసుకోగా.. 19 లక్షల 37 వేల మంది వృద్ధులు రెండో డోసు తీసుకున్నారు. 45-59 మధ్య వయస్కుల వారిలో 3 కోట్ల 19 లక్షలకు పైగా తొలి డోసు, 6 లక్షల 76 వేలకు పైగా రెండో డోసు తీసుకున్నారు.

ఇదీ చదవండి:మహారాష్ట్రలో ఒక్కరోజే 63,294 కరోనా కేసులు