Modi Putin Talks : వచ్చే నెలలో దిల్లీలో జరగనున్న జీ-20 దేశాధినేతల సదస్సుకు తాను హాజరు కాలేనంటూ ప్రధాని మోదీకి తెలిపారు రష్యా అధ్యక్షుడు వ్లాదిమిర్ పుతిన్. రష్యా తరఫున విదేశాంగ మంత్రి సెర్గీ లావ్రోవ్ భారత్‌కు వస్తారని పుతిన్ వెల్లడించారు. ఈ మేరకు మోదీతో పుతిన్ ఫోన్లో మాట్లాడారని ప్రధాని కార్యాలయం తెలిపింది.
ఇద్దరు నాయకులు భారత్-రష్యా మధ్య ద్వైపాక్షిక సహకారానికి సంబంధించిన అనేక అంశాలపై ఫోన్లో సమీక్షించినట్లు PMO ఓ ప్రకటనలో వెల్లడించింది. దక్షిణాఫ్రికాలోని జోహన్నెస్‌బర్గ్‌లో ఇటీవల ముగిసిన బ్రిక్స్ శిఖరాగ్ర సమావేశం సహా పలు ప్రాంతీయ ప్రపంచ సమస్యలపై ఇద్దరు నేతలు అభిప్రాయాలను పంచుకున్నారని పేర్కొంది.
భారత్ అధ్యక్షతన జీ 20 సమావేశం
G20 Summit 2023 :కాగా, ఈ ఏడాది జీ-20 బృందానికి భారత్ అధ్యక్షత వహిస్తుంది. సెప్టెంబరు 9-10 తేదీల్లో దిల్లీ వేదికగా జీ-20 దేశాధినేతల సదస్సు జరగనుంది.ఈ మేరకు దిల్లీలో పెద్ద ఎత్తున్న ఏర్పాట్లు చేస్తోంది భారత్. ఈ సమావేశానికి పుతిన్ వ్యక్తిగతంగా హాజరయ్యే అవకాశాలున్నాయని గతంలో వార్తలు వచ్చాయి.