గ్రామీణ ప్రాంతాల్లో ఆరోగ్య సంరక్షణ వనరులను పెంచాలని అధికారులను ప్రధాన మంత్రి నరేంద్ర మోదీ ఆదేశించారు. ఇంటింటికీ కరోనా పరీక్షలు నిర్వహించటం, పర్యవేక్షణ చేయటంపై దృష్టి సారించాలని తెలిపారు. దేశంలో కరోనా పరిస్థితులపై అధికారులతో ఆయన ఉన్నతస్థాయి సమీక్ష నిర్వహించారు.
పాజిటివిటీ రేటు అధికంగా ఉన్న ప్రాంతాల్లో కొవిడ్ పరీక్షలను మరింత పెంచాలని అధికారులకు మోదీ సూచించారు. స్థానికంగా కంటెయిన్మెంట్ జోన్ల ఏర్పాటు చేసుకునేలా చర్యలు తీసుకోవాలని తెలిపారు. గ్రామీణ ప్రాంతాల్లోని రోగులకు ఆక్సిజన్ పంపిణీ ప్రక్రియ సక్రమంగా జరగాలని ఆదేశించారు. గ్రామీణ ప్రాంతాల్లో కరోనా కట్టడిలో భాగంగా అంగన్వాడీ, ఆశా కార్యకర్తలను అన్ని రకాల సాధనాలను సమకూర్చాలని చెప్పారు. ఆరోగ్య సిబ్బందికి వెంటిలేటర్లు, ఇతర పరికరాలను వినియోగించటంలో తగిన శిక్షణ అందించాలని ఆదేశించారు.
మార్చి ప్రారంభంలో వారానికి 50 లక్షలు జరగగా.. ప్రస్తుతం వారానికి 1.3 కోట్ల పరీక్షలు జరుగుతున్నాయని మోదీ ఈ సమావేశంలో పేర్కొన్నారు. కరోనా బాధితులు, మరణాల సంఖ్యను రాష్ట్రాలు పారదర్శకంగా చూపించాలని కోరారు. ప్రస్తుత కరోనా పరిస్థితిని పవర్‌ పాయింట్‌ ప్రజెంటేషన్‌ రూపంలో అధికారులు మోదీకి వివరించారు. కొన్ని రోజులుగా పాజిటివిటీ రేటు నెమ్మదిగా తగ్గుతూ వస్తోందని, అదే సమయంలో రికవరీ రేటు బాగుందని తెలిపారు. రాష్ట్రాల వారీగా కరోనా పరీక్షలు, ఆక్సిజన్ వివరాలు, మౌలిక సదుపాయాలు, వ్యాక్సిన్‌ రోడ్‌ మ్యాప్‌ను మోదీకి అధికారులు వివరించారు.