ఉత్తర్ప్రదేశ్లో అదృశ్యమైన ఓ వ్యక్తి 11ఏళ్ల తర్వాత సొంతూరికి వచ్చాడు. ఇన్నేళ్లూ పాకిస్థాన్లో జైల్లో గడిపిన పున్వాసి.. ఎట్టకేలకు మిర్జాపుర్కు చేరుకున్నాడు. అయితే.. జ్ఞాపకశక్తి మందగించిన అతడు.. కనీసం తమ కుటుంబ సభ్యులు, బంధుమిత్రులనూ గుర్తించలేని స్థితిలో ఉండటం.. అక్కడి వారిని కలచివేస్తోంది. ఈ తరుణంలో పున్వాసి మళ్లీ ఇల్లు వదిలి వెళతాడేమోననే భయంతో.. రాత్రంతా అతడికి కాపలాగా ఉందా కుటుంబం.
సోదరి దిగ్భ్రాంతి..
కొత్వాలి ప్రాంతానికి చెందిన పున్వాసి.. 2009లో ఇల్లు వదిలి వెళ్లిపోయాడు. 11 ఏళ్ల పాటు పాక్ జైల్లోనే నరకం అనుభవించిన అతడు.. ఎట్టకేలకు ఈ నెల 5న ఇంటికి చేరుకున్నాడు. అతడి తల్లిదండ్రులు, ఐదుగురు అన్నదమ్ములు చనిపోయారు. అతడి గుడిసె కూలిపోయింది. ఒక్కగానొక్క సోదరి కిరణ్ దేవి.. లాల్గంజ్ బహుతిలోని వాళ్ల బంధువుల ఇంట్లో ఉంటోంది. తన సోదరుడు వచ్చాడనే వార్త తెలియగానే.. ఎంతో సంతోషించింది. అయితే.. మతిస్తిమితం సరిగాలేని అతడిని కలవగానే ఆ ఆనందం కాస్తా ఆవిరై.. తీవ్ర విచారానికి లోనైందామె.
పున్వాసి మానసిక స్థితికి సంబంధించి చికిత్స చేయించాలని స్థానిక అధికార యంత్రాంగాన్ని ఆశ్రయించింది అతడి సోదరి.