ఉగ్ర స్థావరం గుర్తింపు- భారీ ఆయుధాలు స్వాధీనం

జమ్ముకశ్మీర్​లో ఉగ్రవాద రహస్య స్థావరాన్ని గుర్తించాయి భద్రతా బలగాలు. పూంచ్​ జిల్లాలో శనివారం చేపట్టిన ఆపరేషన్​లో భాగంగా ఆ స్థావరం నుంచి భారీ ఆయుధాలను స్వాధీనం చేసుకున్నట్లు తెలిపాయి.

జమ్ముకశ్మీర్​లో ఉగ్రవాద రహస్య స్థావరాన్ని ఛేదించాయి సరిహద్దు భద్రతా బలగాలు. పూంచ్​ జిల్లాలోని బయటపడిన ఆ స్థావరం నుంచి భారీ ఆయుధాలు, మందుగుండు సామగ్రిని స్వాధీనం చేసుకున్నట్టు రక్షణ ప్రతినిధి తెలిపారు.

మండీ పట్టణానికి 10కిలోమీటర్ల దూరంలో గల హాదిగూడలోని దోబా మొహల్లా అటవీ ప్రాంతంలో తనిఖీలు నిర్వహిస్తుండగా ఈ స్థావరం బయటపడినట్టు పేర్కొన్నారు అధికారులు. అక్కడి నుంచి మూడు మ్యాగజైన్​ల ఏకే47 రైఫిల్​(82 రౌండ్ల సామర్థ్యం), 33 రౌండ్ల మూడు చైనీస్​ పిస్టల్స్​(5 మ్యాగజైన్స్​), 4 చేతి గ్రెనేడ్​లను స్వాధీనం చేసుకున్నాయి భద్రతా బలగాలు. అంతేకాకుండా.. అండర్​ బారెల్​ గ్రెనేడ్​ లాంఛర్​(యూబీజీఎల్​), ఓ వైర్​లెస్​ సెట్​నూ ఆ ప్రాంతంలో ఉన్నట్టు సైన్యం వెల్లడించింది.

ఉగ్రవాదులు ఉన్నారనే పక్కా సమాచారంతోనే ఈ ఆపరేషన్​ చేపట్టినట్టు తెలిపాయి. అయితే.. ఎడతెరిపి లేకుండా వర్షం కురుస్తున్నప్పటికీ ఆపరేషన్​ను కొనసాగిస్తోంది సైన్యం.

ఇదీ చదవండి:పాక్​ సరిహద్దులో మరో సొరంగం- సైన్యం గుర్తింపు