దేశంలో కరోనా తగ్గుముఖం పడుతున్నా.. కొత్త వేరియంట్ల కలకలంతో అప్రమత్తంగా ఉండాలని రాష్ట్రాలను కేంద్ర ప్రభుత్వం ఆదేశించింది. యాక్టివ్ కేసులు తగ్గుతున్న నేపథ్యంలో పలు రాష్ట్రాలను ఆంక్షలను సడలిస్తున్నాయని.. అయితే ఈ విషయంలో జాగ్రత్తలు పాటించాలని పేర్కొంది. పాజిటివిటీ రేటు అధికంగా ఉన్న జిల్లాల్లో కఠిన ఆంక్షలు విధించాలని కేంద్ర హోం మంత్రిత్వ శాఖ కార్యదర్శి అజయ్భల్లా పేర్కొన్నారు. కేసులు ఎక్కువగా ఉన్న జిల్లాల్లోని ప్రాంతాలను కంటైన్‌మెంట్‌ జోన్లుగా ప్రకటించాలని సూచించారు. అనుసంధానంగా ఉన్న జిల్లాల్లో కఠిన పర్యవేక్షణ అవసరమన్నారు.
"ఆంక్షలను సడలించే ప్రక్రియను కేంద్ర ఆరోగ్య మంత్రిత్వ శాఖ జారీ చేసిన మార్గదర్శకాలకు అనుగుణంగా రాష్ట్రాలు చర్యలు తీసుకోవాల్సిన అవసరముంది. రాష్ట్రాలు.. రోజూ పాజిటివిటీ రేటు, ఆస్పత్రుల్లో రోగుల సంఖ్య నిశితంగా పరిశీలించాలి. పాజిటివిటీ రేటు, రోగుల సంఖ్య పెరుగుతున్నట్లయితే.. ఆంక్షలు విధించాలి. అలాగే వైద్య మౌలిక సదుపాయాలను మెరుగుపరచడానికి అవసరమైన చర్యలు తీసుకోవాలి."